ডকমকাৰ পৰা অপহৃত ব্যৱসায়ীক হাওৰাঘাটৰ পৰা উদ্ধাৰ

কাৰ্বি আংলঙৰ ডকমকাৰ পৰা অপহৃত ব্যৱসায়ী বিজয় আগৰৱালাক বৃহস্পতিবাৰে উদ্ধাৰ কৰা হয়।

হাওৰাঘাট আৰক্ষী থানাৰ অন্তৰ্গত হাওৰাঘাটৰ অন্যতম অভিযুক্ত তপন টেৰণৰ ঘৰৰ পৰা তেওঁক উদ্ধাৰ কৰা হয়।

এই সন্দৰ্ভত আৰক্ষীয়ে তপন টেৰণ (৪৭) আৰু তেওঁৰ সহযোগী সঞ্জয় গোৱালাক (৩০)তপন টেৰণৰ ঘৰৰ পৰা গ্ৰেপ্তাৰ কৰে।

ইয়াৰ পূৰ্বে আৰক্ষীয়ে জনক বসুমতাৰী (৪০) নমাৰ লোকজনক গ্ৰেপ্তাৰ কৰিছিল।

বসুমতাৰীক জেৰা চলোৱাৰ পাছতে আৰক্ষীয়ে ব্যৱসায়ীজনৰ অপহৰণৰ বি,য়ে তথ্য লাভ কৰে।

গ্ৰেপ্তাৰ কৰা তিনিওজনকে অধিক জেৰাৰ বাবে ডিফুলৈ অনা হৈছে।

আৰক্ষী অধীক্ষকৰ কাৰ্যালয়ত অতিৰিক্ত আৰক্ষী অধীক্ষক (সদৰ) ইন্দ্ৰনীল বৰুৱাই সংবাদ মাধ্যমক জানিবলৈ দিয়ে,’’১৩ ছেপ্টেম্বৰৰ নিশা মটৰ চাইকেলেৰে অহা তিনিজন লোকে বিজয় আগৰৱালাক অপহৰণ কৰিছিল।‘’

‘’অপহৃতৰ পৰিয়ালৰ পৰা এক কোটি টকাৰ মুক্তিপন দাবী কৰা হৈছিল,’’-তেওঁ লগতে কয়।

অভিযুক্ত তিনিজনৰ বিৰুদ্ধে ডকমকা আৰক্ষী থানাত ভাৰতীয় দণ্ডবিধিৰ ৩৬৫/৩২৩/৩৪ ধাৰাৰ অধীনত ৬২/১৯ নম্বৰত এটা গোচৰ ৰুজু কৰা হয়।

ঘটনাৰ বলি বিজয় আগৰৱালাই কয় যে তেওঁক চকুত কাপোৰ বান্ধি লৈ যোৱা হৈছিল।

তেওঁক খাবলৈ দিয়া হৈছিল যদিও পৰিয়ালৰ লোকৰ সৈতে যোগাযোগ কৰাৰ অনুমতি দিয়া হোৱা নাছিল।