উপ-নিৰ্বাচন : চাৰিওটা সমষ্টিৰ বাবে প্ৰাৰ্থীৰ তালিকা প্ৰকাশ কৰিলে বিজেপিয়ে

মনোনয়ন পত্ৰ দাখিলৰ এদিন পূৰ্বে আজি শাসনাধিষ্ঠিত বিজেপিয়ে চাৰিটা সমষ্টিৰ উপ-নিৰ্বাচনৰ বাবে প্ৰাৰ্থীৰ তালিকা ঘোষণা কৰিছে।

দলটোৱে সোণাৰি সমষ্টিত নৱনীতা সন্দিকৈ, ৰঙাপৰাত ৰাজেন বৰঠাকুৰ, ৰাতাবাৰীত বিজয় মালাকাৰ আৰু জনিয়া সমষ্টিত তৌফিক ৰহমানক প্ৰাৰ্থিত্ব দিছে।

২১ অক্টোবৰত নিৰ্বাচন হ’ব লগীয়া বিধানসভা সমষ্টিকেইটাৰ বাবে কাইলৈ মনোনয়ন পত্ৰ দাখিলৰ তাৰিখ।

সমষ্টিকেইটাৰ নিৰ্বাচিত প্ৰতিনিধিকেইজন সাংসদৰূপে লোকসভালৈ নিৰ্বাচিত হোৱাৰ ফলত বিধানসভাৰ আসনকেইখন খালী হৈ আছে।

কংগ্ৰেছে ইতিপূৰ্বে ২৮ ছেপ্টেম্বৰত চাৰিওটা সমষ্টিৰ বাবে প্ৰাৰ্থীৰ নাম ঘোষণা কৰিছিল।

আন এটা বিৰোধী দল এ আই য়ু ডি এফে কেৱল জনিয়া সমষ্টিত প্ৰতিদ্বন্দ্বিতা কৰিব আৰু প্ৰাৰ্থীৰ নামো ঘোষণা কৰিছে। হাফিজ ৰফিকুল ইছলামক প্ৰাৰ্থিত্ব দিছে ধৰ্মীয় সংখ্যালঘু-প্ৰধান দলটোৱে।

অহা ১ অক্টোবৰ হ’ল মনোনয়ন পত্ৰ পৰীক্ষাৰ তাৰিখ আৰু প্ৰাৰ্থীৰ মনোনয়ন প্ৰত্যাহাৰৰ তাৰিখ ৩ অক্টোবৰ।

২১ অক্টোবৰত অনুষ্ঠিত হ’ব লগীয়া নিৰ্বাচনৰ ভেট গণনা আৰু ফলাফল ঘোষণা হ’ব ২৪ অক্টোবৰত।