শিৱসাগৰত বিশ্ব পৰ্যটন দিৱস উপলক্ষে ‘পৰ্যটন আৰু নিয়োগ’ বিষয়ক আলোচনা চক্ৰ সম্পন্ন

সমগ্ৰ বিশ্বৰ লগতে অসমতো বৰ্ণাঢ্য কাৰ্যসূচীৰে উদযাপন কৰা হয় বিশ্ব পৰ্যটন দিৱস। উজনি অসমৰ অন্যতম পৰ্যটনস্থলী শিৱসাগৰ জিলাৰ আমগুৰিত বিশ্ব পৰ্যটন দিৱস উদযাপন কৰা হয়।

শিৱসাগৰ জিলা পৰ্যটন কাৰ্যালয়ৰ উদ্যোগত আমগুৰি মহাবিদ্যালয় প্ৰেক্ষাগৃহত বিশ্ব পৰিবেশ দিৱসৰ এই বছৰৰ আলোচ্য বিষয় “পৰ্যটন আৰু নিয়োগ”ৰ ওপৰত এক গুৰুত্বপূৰ্ণ আলোচনাচক্ৰ অনুষ্ঠিত হয়।

অনুষ্ঠানত কেৰিয়াৰ কন্সালটেণ্ট ৰঞ্জন কুমাৰ বৰুৱা, ফুড ক্ৰাফ্ট ইনষ্টিটিউট চামগুৰিৰ ফেকাল্টি প্ৰবাল শৰ্মা বৰদলৈ, শিৱসাগৰ জিলা সহকাৰী পৰ্যটক তথ্য বিষয়া মাধৱ দাস, ট্যুৰিষ্ট গাইড এচোছিয়েশ্যন শিৱসাগৰ জিলাৰ সভাপতি তথা ট্যুৰিষ্ট গাইড গৌতম হীৰাৰ লগতে আমগুৰি মহাবিদ্যালয়ৰ প্ৰবক্তা আৰু ছাত্ৰ-ছাত্ৰীসকল উপস্থিত থাকে।

মূলত: এই আলোচনাচক্ৰত জিলাখনত পৰ্যটনৰ সম্ভাৱনা থকা স্থানসমূহৰ সৰ্বাংগীন উন্নয়নৰ লগতে নৱপ্ৰজন্মৰ মাজত পৰ্যটন ক্ষেত্ৰত নিয়োগ সন্দৰ্ভত বিশিষ্ট ব্যক্তিসকলে বক্তব্য আগবঢ়ায়।

বিশ্ব পৰ্যটন দিৱস উপলক্ষে যোৱা ২৭ ছেপ্টেম্বৰত জিলা পৰ্যটন কাৰ্য্যালয়ৰ উদ্যোগত শিৱসাগৰ নগৰৰ বৰপুখুৰী পাৰত থকা  ললিত ৰাজখোৱা উদ্যানত এক স্বচ্ছতা অভিযান চলোৱা হয়।

উক্ত অভিযানত উদ্যান খনৰ চৌহদ সহকাৰী পৰ্যটন তথ্য বিষয়া মাধৱ দাসৰ নেতৃত্বত পৰ্যটন কাৰ্য্যালয়ৰ কৰ্মচাৰী সকলে চাফ-চিকুণ কৰে।