বন্যপ্ৰাণী সপ্তাহৰ সৈতে সংগতি ৰাখি কাজিৰঙাত সদৌ অসম ভিত্তিত কুইজ প্ৰতিযোগিতা

বন্যপ্ৰাণী সপ্তাহৰ লগত সংগতি ৰাখি আজি কাজিৰঙা ৰাষ্ট্ৰীয় উদ্যানৰ কহঁৰাত উদ্যান কৰ্তৃপক্ষৰ উদ্যোগত সদৌ অসম ভিত্তিত কুইজ প্ৰতিযোগিতা অনুষ্ঠিত হয়। কহঁৰাৰ শতবৰ্ষ সমাৰোহ প্ৰেক্ষাগৃহত আয়োজিত এই কুইজ প্ৰতিযোগিতাত ৰাজ্যৰ বিভিন্ন প্ৰান্তৰৰ পৰা অহা মুঠ ১৪ টা দলে অংশগ্ৰহণ কৰে।

গ্ৰীন অস্কাৰ বিজেতা ড০ পূৰ্নিমা বৰ্মন, কাজিৰঙাৰ বন বিষয়া আৰু বিভিন্ন সংগঠনৰ প্ৰতিনিধিৰ উপস্থতিত কাজিৰঙাৰ সঞ্চালক পি শিৱকুমাৰে আনুষ্ঠানিকভাৱে প্ৰতিযোগিতাখন উদ্বোধন কৰে।

সঞ্চালক গৰাকীয়ে কুইজৰ মাজেদিও বন্যপ্ৰাণী সংৰক্ষণৰ বতৰা নৱ প্ৰজন্মৰ মাজত প্ৰচাৰ কৰাৰ বাবে আহ্বান জনায়।

কুইজ মাষ্টাৰ নৱজ্যোতি ভড়ালীয়ে পৰিচালনা কৰা এই প্ৰতিযোগিতাত ৰাষ্ট্ৰীয় আইন বিশ্ববিদ্যালয়ৰ হিমাংশু সোনোৱাল আৰু সুদৰ্শন গোস্বামীয়ে প্ৰথম, তেজপুৰ বিশ্ববিদ্যালয়ৰ ৰজিবুল আৱাল আৰু মৃদুল শৰ্মাই দ্বিতীয়, নগাওঁ মহাবিদ্যালয়ৰ অংগৰাগ চাণ্ডিল্য আৰু কুমাৰ পদ্মনাভে তৃতীয় আৰু কেন্দ্ৰীয় প্ৰদ্যোগিক প্ৰতিষ্ঠানৰ অৰ্ণৱ বায়ন আৰু জ্যোতিস্মান গোস্বামীয়ে চতুৰ্থ স্থান দখল কৰিবলৈ সক্ষম হয়।

প্ৰতিযোগিতাৰ শেষত স্থান লাভ কৰা দলসমূহক মানপত্ৰ, বঁটা আৰু নগদ ধনেৰে পুৰস্কৃত কৰা হয়। অনুষ্ঠানত সঞ্চালকৰ উপৰিও পূব অসম বন্যপ্ৰাণী সংমণ্ডলৰ ডি এফ অ’ ৰোহিনী বল্লভ শইকীয়া, বিশ্বনাথ বন সংমণ্ডলৰ ডি এফ অ’ মুকুট চন্দ্ৰ দাস, ৰাষ্ট্ৰীয় উদ্যানৰ গৱেষণা বিষয়া ৰবীন্দ্ৰ শৰ্মাৰ লগতে গোলাঘাট জিলাৰ অবৈতনিক বন বিষয়া উত্তম শইকীয়া উপস্থিত থাকে।