বৃহৎ খবৰ! ছুইছ বেংকত ধন জমা থোৱা ভাৰতীয়ৰ তালিকা অৱশেষত মোদীৰ হাতত

ভাৰত চৰকাৰে ছুইছ বেংকত ধন জমা ৰখা ভাৰতীয়ৰ প্ৰথমখন তালিকা লাভ কৰিছে।

ভাৰতকে ধৰি বিশ্বৰ মুঠ ৭৫খন দেশক তেওঁলোকৰ নাগৰিকৰ ছুইছ বেংকৰ একাউণ্টৰ তথ্য ছুইজাৰলেন্দৰ ফেদাৰেল টেক্স এদমিনিষ্ট্ৰে’চনে বিনিময় কৰিছে।

বাতৰি মতে, স্বয়ংক্ৰিয় তথ্য বিনিময় (Automatic Exchange of Information) চুক্তিৰ অধীনত বিত্তীয় বেংক সম্বন্ধীয় তথ্য বিনিময় কৰা বুলি এফ টি এৰ মুখপাত্ৰই সদৰী কৰিছে।

ছুইজাৰলেন্দত ২০১৭ চনৰ ১ জানুৱাৰিৰ পৰা এ ই অ’ আই বলবৎকৰণৰ বাবে লাগু হোৱা আইনী ভিত্তিৰ আধাৰত এই তথ্য যোগান ধৰা হৈছে।

ভাৰতে এয়ে প্ৰথমবাৰৰ বাবে ছুইছ কৰ্তৃপক্ষৰ পৰা এ ই অ’ আই ফ্ৰে’মৱৰ্কৰ অধীনত তথ্য লাভ কৰিছে।

খবৰ মতে, ছুইছ বেংকত সক্ৰিয় থকা ভাৰতীয় জমাকাৰীৰ একাউণ্টৰ লগতে ২০১৮ চনত বন্ধ কৰা একাউণ্টৰ তথ্যও প্ৰদান কৰা হৈছে।

বিনিময় কৰা তথ্যত জমাকৰ্তাৰ পৰিচয়, বেংক একাউণ্ট আৰু বিত্তীয় তথ্য অন্তৰ্ভুক্ত হৈ আছে।

এই সম্বন্ধীয় সবিশেষ তথ্য সদৰী কৰিবলৈ অস্বীকাৰ কৰি এফ টি এ মুখপাত্ৰই জনোৱা মতে বিনিময় কৰা তথ্যখিনিত গোপনীয়তাৰ দফাও সংযোগ হৈ আছে।

এই সম্বন্ধীয় পৰৱৰ্তীলানি তথ্য ২০২০ চনৰ ছেপ্তেম্বৰত বিনিময় কৰা হ’ব, মুখপাত্ৰগৰাকীয়ে জনায়।

বিদেশৰ ক’লা ধন দেশলৈ ঘূৰাই অনাৰ প্ৰতিশ্ৰুতিৰে ভাৰতবাসীৰ মনত আশাৰ সঞ্চাৰ কৰা প্ৰধান মন্ত্ৰী মোদী নেতৃত্বাধীন চৰকাৰৰ পৰৱৰ্তী পদক্ষেপ নিঃসন্দেহে লক্ষণীয় হ’ব।