বোকাখাতত প্ৰতিমা বিসৰ্জন দিবলৈ যোৱা গাড়ী দুৰ্ঘটনাগ্ৰস্ত; ২৫জন লোক আহত

দুৰ্গা পূজাৰ প্ৰতিমা বিসৰ্জন দি ঘুৰি যোৱাৰ পথত বোকাখাতৰ লতাবাৰীত ৩৭ নং ৰাষ্ট্ৰীয় পথত মঙলবাৰে সন্ধিয়া এক পথ দুৰ্ঘটনা সংঘৰ্টিত হয়। দুৰ্ঘটনাৰ ফলত শিশু, মহিলাসহ ২৫ জন লোক আহত হয়। ইয়াৰে ৯জনৰ অৱস্থা সংকটজনক।

জানিব পৰা মতে  মদ্যপান কৰি এখন মাৱলবাহী টাটা এচিৰ চালকে আন এখন গাড়ীক অতিক্ৰম কৰিবলৈ গৈ নিয়ন্ত্ৰণ হেৰুৱাই এই দুৰ্ঘটনাটো সংঘৰ্টিত কৰে।

স্থানীয় ৰাইজৰ সহযোগত আহত লোকসকলক বোকাখাত অসামৰিক চিকিৎসালয়ত ভৰ্তি কৰোৱা হয় যদিও ইয়াৰে সংকটজনক অৱস্থাত থকা ৯ জন লোকক পিছত যোৰহাট চিকিৎসা মহাবিদ্যালয়লৈ প্ৰেৰণ কৰা হয়।

উল্লেখযোগ্য যে দুৰ্ঘটনাত পতিত হোৱা মালবাহী এ এছ ০৫ চি – ৮৩১০ নম্বৰৰ টাটা এচি গাড়ীখনত মেঠনি চাহ বাগিচা আৰু শিলজুৰী চাহ বাগিচাৰ লোক আছিল।

উক্ত গাড়ীখনতে উঠি লোকসকলে লচাবাৰীত ডিফলু নদীত প্ৰতিমা বিসৰ্জন দিবলৈ গৈছিল। স্থানীয় ৰাইজৰ মতে গাড়ীৰ চালকে মদ্যপান কৰি গাড়ী চলোৱাৰ বাবেই এই দুৰ্ঘটনা হ’বলৈ পালে।