ৰাফেল বিমান চমজি লৈয়ে “ঔম” আঁকিলে, চকাৰ তলত নেমু দিলে ৰাজনাথ সিঙে; ছ’চিয়েল মিডিয়াত হাঁহিৰ খোৰাক

অতি শক্তিশালী আৰু অত্যাধুনিক প্ৰযুক্তিৰে ফ্ৰান্সে নিৰ্মাণ কৰা আৰু উচ্চ দৰৰ ৩৬খন ৰাফেল যুদ্ধ বিমান চমজি লৈছে ভাৰতৰ প্ৰতিৰক্ষা মন্ত্ৰী ৰাজনাথ সিঙে।

সিঙে বিমানকেইখন চমজি লৈয়ে ভাৰতীয় পৰম্পৰাৰে পূজা-পাতল কৰা দৃশ্য ছ’চিয়েল মিডিয়াত ভাইৰেল হৈছে, যিটোৰ মাজত বহুতে হাঁহিৰ খোৰাক বিচাৰি লৈছে।

ছ’চিয়েল মিডিয়াত ঘূৰি ফুৰা ফটোকেইখনত ৰাজনাথ সিঙে এখন বিমানৰ উপৰিভাগত ৰঙা ৰঙেৰে ঔমকাৰ চিহ্ন অংকন কৰা আৰু চকাৰ তলত নেমু ৰখা দেখা গৈছে। ইয়াৰ এটা ভিডিঅ’ও উপলব্ধ।

তিনি দিনীয়া ফ্ৰান্স ভ্ৰমণলৈ যোৱা প্ৰতিৰক্ষা মন্ত্ৰীজনে ৮ অক্টোবৰত বিমানকেইখন চমজি লৈ ইয়াৰে এখনত উঠি এটা পাকো মাৰে। তেওঁ ৰাফেল বিমানত উঠি উৰা ভাৰতৰ প্ৰথমজন প্ৰতিৰক্ষা মন্ত্ৰীত পৰিণত হয়।

সিঙে ৰাফেল বিমানকেইখনৰ হস্তান্তৰক এটা মাইলৰ খুঁটি আখ্যা দি ই ভাৰত-ফ্ৰান্সৰ সম্পৰ্ক সুদৃঢ় কৰিব বুলি মন্তব্য কৰে।

“ৰাফেল বিমানকেইখন সময়ত দিয়া বাবে মই সুখী। মোৰ পূৰা বিশ্বাস যে ই আমাৰ বায়ুসেনা বাহিনীক অধিক শক্তিৰ যোগান ধৰিব”, সংবাদ মাধ্যমত সিঙৰ মন্তব্যৰ উদ্ধৃতি।

ৰাফেল বিমানত উৰণৰ পূৰ্বে সিঙে ফ্ৰান্সৰ ৰাষ্ট্ৰপতি ইমানুৱেল মেক্ৰনক সাক্ষাৎ কৰি বিভিন্ন দিশ আলোচনা কৰে। মেক্ৰনৰ সৈতে হোৱা সাক্ষাৎকাৰক “উৎকৃষ্ট” আখ্যা দি এটা টুইটো কৰে ভাৰতৰ প্ৰতিৰক্ষা মন্ত্ৰীজনে।

ৰাফেল বিমান আশা কৰাতকৈ বহু বেছি দামত ক্ৰয় কৰা আৰু ইয়াৰ চুক্তিত বিশেষ এটা ক’ৰ্পৰেট গোষ্ঠীয়ে মোদী চৰকাৰৰ অবাঞ্ছিত অনুগ্ৰহ (favour)লাভ কৰা বুলি ভাৰতত বিৰোধীয়ে শাসক বিজেপিক কঠোৰ সমালোচনা কৰি আহিছে।