বৰপেটাৰ আতচবাজী উদ্যোগত ভয়াৱহ অগ্নিকাণ্ড; গুৰুতৰভাৱে আহত ১২গৰাকী শ্ৰমিক

পোহৰৰ উৎসৱ দীপাৱলীলৈ মাজত মাথোঁ কেইটামান দিন বাকী থকা অৱস্থাত বৰপেটাৰ আতচবাজী উদ্যোগত সংঘটিত হয় এক ভয়াৱহ অগ্নিকাণ্ডৰ ঘটনা।

আতচবাজী প্ৰস্তুত কৰি থকা অৱস্থাতে সোমবাৰে বিয়লি সংঘটিত হয় এই অগ্নিকাণ্ডৰ ঘটনা ৷

দীপ পাঠক মালিকানাধীন “বৰপেটা আতচবাজী উদ্যোগ”ত সংঘটিত এই অগ্নিকাণ্ডত প্ৰায় ১২ জনকৈ শ্ৰমিক গুৰুতৰভাৱে আঘাতপ্ৰাপ্ত হয় ৷

দীপ পাঠকৰ ঘৰৰ পিচফালে একাংশ শ্ৰমিকে কাম কৰি থকা অৱস্থাতে এই ভয়াৱহ ঘটনা সংঘটিত হয় বুলি জানিব পৰা গৈছে ৷

অগ্নিকাণ্ড সংঘটিত হোৱাৰ লগে লগে অঞ্চলটোত হুৱা দুৱা লাগে ৷ পাছত অগ্নিনিৰ্বাপক বাহিনীৰ গাড়ীয়ে জুই নিৰ্বাপিত কৰে৷

আঘাতপ্ৰাপ্ত সকলক লগে লগে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়লৈ লৈ যোৱা হয় ৷

আঘাতপ্ৰাপ্ত মুঠ ১২গৰাকী শ্ৰমিকৰ ভিতৰত দুগৰাকী মহিলা শ্ৰমিকৰ অৱস্থা সংকটজনক বুলি জানিব পৰা গৈছে ৷

আহত সকলৰ মাজত দুজন কিশোৰো থকা বুলি জানিব পৰা গৈছে ৷

উদ্যোগটোৰ স্বত্বাধিকাৰীৰ পৰা জানিব পৰা মতে, আতচবাজী প্ৰস্তুতৰ বাবে উৰালত কেঁচামাল খুন্দি থকা অৱস্থাত অগ্নিকাণ্ডৰ সূত্ৰপাত হয় ৷

উল্লেখ্য যে, অগ্নিকাণ্ড সংঘটিত হোৱা বৰপেটা আতচবাজী উদ্যোগৰ ওচৰতে মনি চুনা আতচবাজী উদ্যোগ আৰু অসম ফায়াৰ ৱৰ্কচ নামৰ আতচবাজী উদ্যোগ আছে যদিও সৌভাগ্যক্ৰমে এই দুটা উদ্যোগ ৰক্ষা পৰে ৷