ভাৰতৰ প্ৰাক্তন ৰাষ্ট্ৰপতি ভাৰতৰত্ন প্ৰণৱ মুখাৰ্জীৰ পৰলোকপ্ৰাপ্তি

ভাৰতৰ প্ৰাক্তন ৰাষ্ট্ৰপতি ভাৰতৰত্ন প্ৰণৱ মুখাৰ্জীৰ পৰলোকপ্ৰাপ্তি ঘটিছে। সোমবাৰে সন্ধিয়া ৮৪ বছৰ বয়সত প্ৰণৱ মুখাৰ্জীয়ে শেষ নিশ্বাস ত্যাগ কৰে।

কিছু দিনৰ পৰা অসুস্থ হৈ থকা প্ৰাক্তন ৰাষ্ট্ৰপতিগৰাকীৰ দিল্লীৰ আৰ আৰ হাস্পতালত মৃত্যু হোৱা বুলি তেওঁৰ পুত্ৰ অভিজিৎ মুখাৰ্জীয়ে টুইটাৰযোগে জনায়।

উল্লেখ্য যে প্ৰাক্তন ৰাষ্ট্ৰপতি গৰাকী যোৱা ১০ আগষ্টত ক’ভিড-১৯ত আক্ৰান্ত হৈছিল। ইয়াৰ পিছতে তেওঁৰ মস্তিষ্কৰ এক অস্ত্ৰোপচাৰো সম্পন্ন হৈছিল।

অস্ত্ৰোপচাৰ সম্পন্ন হোৱাৰ পিছৰে পৰা তেওঁৰ স্বাস্থ্যৰ অৱস্থা উন্নতি হোৱা নাছিল। চিকিৎসকৰ এটা বৃহৎ দলে তেওঁক সুস্থ কৰাৰ আপ্ৰাণ চেষ্টা চলাইও অৱশেষত আজি ব্যৰ্থ হয়।

১৯৩৫ চনৰ ১১ ডিচেম্বৰত জন্মগ্ৰহণ কৰা প্ৰণৱ মুখাৰ্জী ২০১২ চনৰ পৰা ২০১৭ চনলৈকে ৰাষ্ট্ৰপতিৰ পদত অধিষ্ঠিত হৈ আছিল। তেওঁক ভাৰতৰত্ন প্ৰদান কৰা হৈছিল ২০১৯ চনত।

দেশৰ ৰাজনীতিত এগৰাকী অভিজ্ঞ ৰাজনীতিবিদ হিচাপে পৰিচিত প্ৰণৱ মুখাৰ্জীয়ে পূৰ্বৰ মনমোহন সিং নেতৃত্বাধীন কংগ্ৰেছ চৰকাৰৰ কেইবাটাও গুৰুত্বপূৰ্ণ বিভাগৰ মন্ত্ৰীৰ দায়িত্ব পালন কৰিছিল।

প্ৰণৱ মুখাৰ্জীৰ দৰে জ্যেষ্ঠ ৰাজনৈতিক নেতাৰ মৃত্যুত প্ৰধান মন্ত্ৰী, গৃহ মন্ত্ৰী, ৰাষ্ট্ৰপতিৰ লগতে বিভিন্ন আগশাৰীৰ ব্যক্তিয়ে শোকপ্ৰকাশ কৰিছে।