কাইলৈ ইডেনত প্ৰথমখন দিবা-নৈশ গুলপীয়া বলৰ টেষ্ট ম্যেচ; উপস্থিত থাকিব বাংলাদেশৰ প্ৰধান মন্ত্ৰীকে ধৰি বহু ৰথী-মহাৰথী

ভাৰতীয় ক্ৰিকেটত এক নতুন অধ্যায়ৰ সূচনাৰে শুকুৰবাৰে কলকাতাৰ ঐতিহাসিক ইডেন গাৰ্ডেন খেলপথাৰত প্ৰথমবাৰৰ বাবে ভাৰতৰ মাটিত দিবা-নৈশ গুলপীয়া বলৰ টেষ্ট খেল অনুষ্ঠিত হ’ব।

ভাৰত আৰু বাংলাদেশৰ মাজত চলি থকা টেষ্ট শৃংখলাৰ দ্বিতীয়খন টেষ্ট দুপৰীয়া এক বজাৰ পৰা সন্ধিয়া ৮ বজালৈ দিবা-নৈশভাৱে আৰম্ভ হ’ব।

প্ৰথমবাৰৰ গুলপীয়া বলেৰ দিবা-নৈশ টেষ্ট আয়োজন কৰা বিচিচিআয়ে ইতিমধ্যে ইয়াৰ বাবে প্ৰয়োজনীয় প্ৰস্তুতি সম্পূৰ্ণ কৰি তুলিছে।

বিচিচিআইৰ সভাপতি সৌৰভ গাংগুলীয়ে নিজেই চিএবিৰ কাম-কাজৰ অগ্ৰগতিৰ তদাৰক কৰিছে।

দেশৰ মাটিত অনুষ্ঠিত হ’বলগীয়া প্ৰথমখন গুলপীয়া বলৰ টেষ্টৰ বাবে বিচিচিআই য়ে বাংলাদেশৰ প্ৰধান মন্ত্ৰী শ্বেইখ হাছিনাকে ধৰি ভালেমান অতিথিক আমন্ত্ৰণ জনাইছে।

কাইলৈ খেল আৰম্ভ হোৱাৰ পূৰ্বে ইডেনত ভাৰতীয় দলৰ প্ৰাক্তন টেষ্ট অধিনায়ক সকলক সম্বৰ্ধনা জনোৱা হ’ব।

আনহাতে, অষ্ট্ৰেলিয়াৰ বিৰুদ্ধে ২০০২ চনত ইডেনত ভাৰতে সাব্যস্ত কৰা চমকপ্ৰদ বিজয়কো স্মৰণীয় কৰি তোলাৰ লক্ষ্যৰে সেইসময়ৰ ভাৰতীয় দলটোৰ খেলুৱৈ সকলকো আমন্ত্ৰণ জনোৱা হৈছে।

তাৰোপৰি, এম চি মেৰীকম, পি ভি সিন্ধুকে ধৰি ভাৰতীয় খেলজগতৰ বহু সংখ্যক আগশাৰীৰ খেলুৱৈ উপস্থিত থাকিব বুলি জানিব পৰা গৈছে।

উল্লেখযোগ্য যে, আমন্ত্ৰিত অতিথি সকলৰ বাবে আয়োজন কৰা আহাৰৰ মেন্যু বিচিচিআইৰ সভাপতি সৌৰভ গাংগুলী নিজে বাচনি কৰিছে।