অসমত ৯০ শতাংশ, মেঘালয়ত ৬১ শতাংশ লোকৰ নাই আধাৰ কাৰ্ড

অসম আৰু চুবুৰীয়া ৰাজ্য মেঘালয়ৰ গৰিষ্ঠ সংখ্যক লোকৰে আধাৰ কাৰ্ড নাই। ছচিয়েল ইম্পেক্ট এডভাইছৰী গ্ৰুপ ডালবাৰ্গৰ এক প্ৰতিবেদনত এই তথ্য প্ৰকাশ পাইছে।

“ষ্টেট অফ আধাৰ : এ পীপল’ছ পাৰ্ছপেক্টিভ’ প্ৰতিবেদন অনুসৰি অসমৰ ৯০ শতাংশ লোকৰ আৰু মেঘালয়ৰ ৬১ শতাংশ লোকৰেই আধাৰ কাৰ্ড নাই।

প্ৰতিবেদনখনত লগতে কোৱা হৈছে ৯০ শতাংশ আধাৰ কাৰ্ডধাৰী লোকে তেওঁলোকৰ বায়’মেট্ৰিক ডাটা সুৰক্ষিত বুলি বিশ্বাস কৰে আৰু তাৰে ৮০ শতাংশই অনুভৱ কৰে যে পৰিচয় পত্ৰখনে চৰকাৰী ৰাজসাহায্য তথা পেঞ্চন অধিক নিৰ্ভৰযোগ্য কৰি তোলে।

প্ৰতিবেদনখনৰ মতে ৯০ শতাংশ আধাৰ কাৰ্ডধাৰী লোকে ভুলকৈ বিশ্বাস কৰে যে ১২ টা সংখ্যাৰ একক পৰিচয় নম্বৰটো বেংক একাউন্টৰ বাবে প্ৰয়োজন।

প্ৰতিবেদনখনত প্ৰকাশ কৰা হৈছে যে দেশৰ মুঠ জনসংখ্যাৰ ভিতৰত ৮ শতাংশ লোকে এতিয়াও আধাৰ কাৰ্ড লাভ কৰা নাই।

চলিত প্ৰক্ৰিয়াটো উন্নত কৰি তুলিলে আধাৰ কাৰ্ড ব্যৱহাৰকাৰীৰ সংখ্যা বৃদ্ধি পাব বুলিও কোৱা হৈছে।

উল্লেখযোগ্য যে অসমত আধাৰ কাৰ্ডৰ কেন্দ্ৰ সমূহ বৰ্তমান সক্ৰিয় হৈ পৰিছে যদিও আধাৰ কাৰ্ড বনোৱাৰ বাবে জনসাধাৰণ সেইধৰণে আগবাঢ়ি অহা নাই।

আনহাতে, আধাৰ কাৰ্ড সম্পৰ্কে ৰাইজক সজাগ কৰাৰ ক্ষেত্ৰত ৰাজ্যত বিশেষ তৎপৰতা নোহোৱাৰ বাবেও  আধাৰ কাৰ্ডধাৰী লোকৰ সংখ্য কম হৈ থকা বুলি ক’ব পাৰি।