কেন্দ্ৰীয় কেবিনেটৰ বৈঠকত নাগৰিকত্ব সংশোধনী বিধেয়ক(CAB)ত অনুমোদন

প্ৰধান মন্ত্ৰী নৰেন্দ্ৰ মোদীৰ অধ্যক্ষতাত সংসদভৱনত আজি অনুষ্ঠিত হোৱা কেবিনেটৰ বৈঠকত নাগৰিকত্ব সংশোধনী বিধেয়কত অনুমোদন জনোৱা হয়।

কেন্দ্ৰীয় কেবিনেটৰ বৈঠকত নাগৰিকত্ব সংশোধনী বিধেয়কত অনুমোদন জনোৱাৰ পাছতে সংসদত বিধেয়কখন উত্থাপন কৰা হ’ব।

অসম চৰকাৰৰ এগৰাকী শীৰ্ষস্থানীয় মন্ত্ৰীয়ে দাবী কৰা মতে, অহা ৯ আৰু ১০ ডিচেম্বৰত বিধেয়কখন ক্ৰমে লোকসভা আৰু ৰাজ্যসভাত উত্থাপন কৰা হ’ব।

উল্লেখযোগ্য যে, নাগৰিকত্ব সংশোধনী বিধেয়কৰ প্ৰতিবাদত অসম আৰু উত্তৰ-পূৱত তীব্ৰ প্ৰতিবাদ চলি থকাৰ সময়তে কেবিনেটৰ বৈঠকত বিধেয়কখনে অনুমোদন লাভ কৰাটোৱে যথেষ্ট তাৎপৰ্য্য বহন কৰিছে।

ৰাজ্যত বিধেয়ক বিৰোধী আন্দোলনত প্ৰধান ভূমিকা পালন কৰা সদৌ অসম ছাত্ৰ সন্থাৰ শীৰ্ষ নেতৃত্বৰ সৈতে মঙলবাৰে মুখ্য মন্ত্ৰী সৰ্বানন্দ সোণোৱাল আৰু বিত্ত মন্ত্ৰী হিমন্ত বিশ্ব শৰ্মাৰ উপস্থিতিত কেন্দ্ৰীয় গৃহ মন্ত্ৰী অমিত শ্বাহৰ এখন বৈঠক অনুষ্ঠিত হৈছিল যদিও বৈঠকৰ অন্তত আছু নেতৃত্বক অসন্তুষ্ট দেখা গৈছিল।

আনহাতে, নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে উত্তৰ-পূবৰ দল, সংগঠনৰ সৈতে আলোচনাত মিলিত হ’লেও নাগৰিকত্ব বিধেয়ক সংসদত উত্থাপন কৰাৰ ক্ষেত্ৰত তেওঁলোকে যে কোনোধৰণৰ আপোচ নকৰে সেয়া আজি মোদী কেবিনেটৰ বৈঠকত পুনৰ প্ৰমাণ হ’ল।