শিমলুগুৰি ৰে’ল ষ্টেশ্যনত ২০০ৰো অধিক বহিঃৰাজ্যৰ শ্ৰমিকক আবদ্ধ

নাগৰিকত্ব সংশোধনী বিধেয়ক গৃহীত কৰি ৰাজ্যত বিদেশী আনিবলৈ বিজেপি চৰকাৰে যি চক্ৰান্ত কৰিছে তাৰ প্ৰতিবাদত সমগ্ৰ ৰাজ্যত এতিয়া উত্তাল প্ৰতিবাদ দেখা গৈছে।

এনে প্ৰতিবাদৰ মাজতে আজি পুৱা শিৱসাগৰৰ শিমলুগুৰিত স্থানীয় ৰাইজ আৰু দল সংগঠনে ২০০ৰো অধিক বহিঃৰাজ্যৰ ব্যক্তিক আবদ্ধ কৰে। শিমলুগুৰি ৰে’ল ষ্টেশ্যনত উক্ত শ্ৰমিকসকলক আৱদ্ধ কৰি ৰখা হয়।

জানিব পৰা মতে অ’ এন জি চিৰ অধীনৰ তেলখাদত কাম চলোৱা ‘এক্সেৰেট্ৰ’ নামৰ এটা কোম্পানীয়ে কলিকতাৰ পৰা এইসকল শ্ৰমিকক লৈ আনিছিল। বহিৰাগত কোম্পানীটোৱে থলুৱা লোকক প্ৰতাৰণা কৰি এইদৰে ৰাজ্যৰ বাহিৰৰ শ্ৰমিকক অসমলৈ অনা কাৰ্য্যত জাঙুৰ খাই উঠিছে স্থানীয় দল সংগঠন।

স্থানীয় ৰাইজ তথা দল সংগঠনে শিমলুগুৰি ৰে’ল ষ্টেশ্যনত তেওঁলোকক আৱদ্ধ কৰি ৰাখি ‘অসম এৰি গুচি যাম’, ‘আকৌ অসমলৈ নাহো’, ‘জয় আই অসম’ আদি শ্ল’গান দিবলৈ কয়।

আনহাতে আৱদ্ধ কৰি ৰখা লোকসকলৰ পৰিচয় পত্ৰটো নানা বিসংগতি থকাৰ অভিযোগ উঠিছে। ইয়াৰ উপৰি তেওঁলোকে ভালদৰে হিন্দীও ক’ব নাজানে।

পিছত ঘটনাস্থলীত আৰক্ষী প্ৰশাসনৰ লোক উপস্থিত হৈ উক্ত লোকসকলক নিজৰ জিম্মাত লয়।