অখিল গগৈক ১০ দিনৰ NIAৰ জিম্মাত; অত্যাচাৰ চলোৱাৰ অভিযোগ

ৰাষ্ট্ৰীয় তদন্তকাৰী সংস্থা (NIA)ই গ্ৰেপ্তাৰ কৰি আজি যোৰহাটৰ পৰা গুৱাহাটীলৈ অনা কৃষক নেতা অখিল গগৈক ১০ দিনৰ NIAৰ জিম্মালৈ প্ৰেৰন কৰা হয়। ১৬ ডিচেম্বৰত গগৈক NIAয়ে গ্ৰেপ্তাৰ কৰিছিল।

আজি গুৱাহাটীত থকা NIAৰ আদালতত হাজিৰ কৰোৱা সময়ত অখিল গগৈয়ে সংবাদ মাধ্যমৰ আগত কয়, ‘মোৰ ওপৰত প্ৰচণ্ড অত্যাচাৰ চলিছে। অসমৰ জনতাক বিপথে পৰিচালিত কৰিবৰ বাবে এনে কাম কৰা হৈছে।‘

অখিল গগৈৰ বিৰুদ্ধে NIAয়ে ভাৰতীয় দণ্ডবিধিৰ ধাৰা ১২০ বি (অপৰাধমূলক ষড়যন্ত্ৰৰ শাস্তি), ১২৪ এ (ৰাষ্ট্ৰদ্ৰোহ), ১৫৩ এ (বেআইনী ) আৰু ১৫৩ বি তথা বেআইনী কাৰ্যকলাপ প্ৰতিৰোধ আইন (UAPA)ৰ ধাৰা ১৮ আৰু ৩৯ ডিৰ অধীনত ১৩/২০১৯ নম্বৰৰ গোচৰ ৰুজু কৰে।

আজি পুৱা ১০.৩০ বজাত যোৰহাটৰ পৰা হেলিকপ্টাৰযোগে আনি গুৱাহাটীৰ চানমাৰিত থকা NIAৰ আদালতত হাজিৰ কৰোৱাৰ পিছত ২০ দিনৰ বাবে জিম্মাত বিচাৰিছিল যদিও আদালতে তেওঁক ১০ দিনৰ জিম্মাত ৰখাৰ নিৰ্দেশ দিয়ে।

উল্লেখযোগ্য যে শনিবাৰে অৰ্থাৎ ১৪ ডিচেম্বৰত NIA এ অখিল গগৈৰ বিৰুদ্ধে গোচৰ ৰুজু কৰিছিল।

কেব বিৰোধী আন্দোলনটো মাওবাদী আদৰ্শৰে পৰিচালিত কৰা আৰু অত্যাৱশকীয় সামগ্ৰী কঢ়িওৱা বাহন আৱদ্ধ কৰা বুলি অখিল গগৈৰ লগতে কৃষক মুক্তি সংগ্ৰাম সমিতিৰ নেতা ধৈৰ্য্য কোঁৱৰ তথা ছাত্ৰ মুক্তি সংগ্ৰাম সমিতিৰ মানস কোঁৱৰ, বিটু সোণোৱাল আৰু লক্ষজিৎ গগৈৰ ওপৰত অভিযোগ জাপি দিয়া হৈছে বুলি অধিবক্তা শান্তনু বৰঠাকুৰে জনায়।

আজিৰ NIAৰ আদালতত হাজিৰ কৰোৱা সময়ত আদালতৰ অনুমতিত অখিল গগৈৰ পত্নী গীতাশ্ৰী তামুলী তেওঁৰ পুত্ৰ আৰু বুদ্ধিজীৱী হীৰেন গোহাঁয়ে তেওঁক আদালতৰ ভিতৰত লগ ধৰে।