বীৰ লাচিত সেনাৰ নেতা শৃংখল চলিহাক পুনৰ আটক আৰক্ষীৰ

নাগৰিকত্ব সংশোধনী আইনৰ বিৰুদ্ধে তীব্ৰ প্ৰতিবাদ সাব্যস্ত কৰি শাসনাধিষ্ঠ বিজেপি চৰকাৰক চোকা বাক্যবাণেৰে সমালোচনা কৰা বীৰ লাচিত সেনাৰ কেন্দ্ৰীয় নেতা শৃংখল চলিহাক ডিব্ৰুগড়ৰ বৰবৰুৱাৰ পৰা আৰক্ষীয়ে আজি পুনৰ আটক কৰিছে।

বৰবৰুৱা আৰক্ষীয়ে শৃংখল চলিহাৰ সৈতে আন চাৰিজন লোককো আটক কৰিছিল যদিও পিছত বাকী কেইজনক এৰি দি শৃংখল চলিহাক ডিব্ৰুগড় সদৰ থানালৈ প্ৰেৰণ কৰে।

নেতাগৰাকীক আটক কৰা সন্দৰ্ভত ডিব্ৰুগড় জিলাৰ আৰক্ষী অধীক্ষকে শৃংখল চলিহাক ডিব্ৰুগড় আৰক্ষীয়ে গ্ৰেপ্তাৰ কৰা নাই বুলি জানিবলৈ দি কয় যে গুৱাহাটীৰ এটা গোচৰতহে তেওঁক আটক কৰা হৈছে।

তদুপৰি আৰক্ষী অধীক্ষক গৰাকীয়ে শৃংখল চলিহাক গুৱাহাটীলৈ পঠোৱা হ’ব বুলিও জানিবলৈ দিয়ে।

ঘটনা সন্দৰ্ভত সাংগঠনিক সম্পাদকে জনোৱা অনুসৰি, ‘শৃংখল চলিহাৰ স’তে আমি চাৰিজনে বৰবৰুৱাত এখন সভা শেষ কৰি মৰাণৰ দিশে আহি আছিলো। মৰাণৰ তিলৈত আন এখন সভাত অংশ ল’বলৈ গৈ থাকোতেই লেপেটকটা আৰক্ষী চকীৰ সহযোগত এটা আৰক্ষী দলে আগভেটি ধৰে’।

আৰক্ষীৰ দলটোৱে তেওঁলোকৰ মোবাইল ফোনবোৰ কাঢ়ি লোৱাৰ লগতে শৃংখল চলিহাক এখন ক’লা আইনাযুক্ত বাহনত আৰু আন সদস্যসকলক বেলেগ এখন বাহনত তুলি লৈ যায় বুলি জানিবলৈ দিয়ে।

ইফালে শৃংখল চলিহাক আটক কৰাৰ পিছৰে পৰা বৰবৰুৱাৰ বজাৰ এলেকাত ৩৭ নং ৰাষ্ট্ৰীয় ঘাইপথ অৱৰোধ কৰি নেতাগৰাকীৰ মুক্তিৰ দাবী জনাইছে সংগঠনটোৰ সহস্ৰাধিক কৰ্মীয়ে।

উল্লেখ্য যে,  কিছুদিন পূৰ্বে শিৱসাগৰ আৰক্ষীয়ে গৌৰিসাগৰত গ্ৰেপ্তাৰ কৰিছিল শৃংখল চলিহাক। কিন্তু শৃংখল চলিহাক মুকলি কৰি দিবলৈ শিৱসাগৰ, যোৰহাট, চৰাইদেউ জিলাৰ পৰা শ’ শ’ যুৱক আহি শিৱসাগৰ সদৰ আৰক্ষী থানা ঘেৰাও কৰাত শিৱসাগৰ আৰক্ষীয়ে ৰাতিয়েই তেওঁক মুকলি কৰি দিছিল।