অসম গেছ ক্ৰেকাৰক ৪,৬০০ কোটি টকাৰ ৰাজসাহায্য

ব্ৰহ্মপুত্ৰ ক্ৰেকাৰ আৰু পলিমাৰ লিমিটেড (বি চি পি এল) বা অসম গেছ ক্ৰেকাৰ প্ৰকল্পটোৰ ১৫ বছৰত অন্তৱৰ্তীকালীন আয় ১০ শতাংশ হোৱাটো নিশ্চিত কৰিবলৈ কেঁচা সামগ্ৰীৰ ক্ষেত্ৰত প্ৰয়োজনীয় প্ৰায় ৪,৬০০ কোটি টকাৰ ৰাজসাহায্য প্ৰদান কৰে।

মঙলবাৰে প্ৰধান মন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত অৰ্থনৈতিক পৰিক্ৰমা সম্পৰ্কীয় কেবিনেটৰ বৈঠকত এই সিদ্ধান্ত লোৱা হয়। ইফালে এই সিদ্ধান্তক অসমৰ মুখ্য মন্ত্ৰী সৰ্বানন্দ সোণোৱালে আদৰণি জনায়।

অসম তথা উত্তৰ-পূবৰ প্ৰতি থকা দায়বদ্ধতাৰ বাবেই মোদীয়ে এই সিদ্ধান্ত লৈছে আৰু ইয়ে প্ৰকল্পটোৰ উত্তৰণত যথেষ্ট পৰিমানে অৰিহনা যোগাব বুলিও মুখ্য মন্ত্ৰী সোণোৱালে মন্তব্য কৰে।

সোণোৱালে লগতে কেন্দ্ৰীয় পেট্ৰ’লিয়াম মন্ত্ৰী ধৰ্মেন প্ৰধানকো ধন্যবাদ জনায়।

ইফালে কালিৰ কেবিনেটে অসম গেছ ক্ৰেকাৰৰ প্ৰশাসনিক কৰ্তৃত্ব ৰসায়ন আৰু পেট্ৰ’কেমিকেল দপ্তৰৰ পৰা পেট্ৰ’লিয়াম আৰু প্ৰাকৃতিক গেছ মন্ত্ৰ্যালয়লৈ হস্তান্তৰ কৰা কাৰ্যতো অনুমোদন জনায়।

উল্লেখ্য যে ঐতিহাসিক অসম আন্দোলনৰ ফলশ্ৰুতিত সম্পাদিত হোৱা অসম চুক্তিৰ অধীনত এই লেপেটকটাত গেছ প্ৰকল্পটো স্থাপন কৰা হৈছিল।