ৰাঁচীত হেমন্ত চোৰেনৰ শপত গ্ৰহণত ঐক্যবদ্ধ হ’ব বিজেপি বিৰোধী শক্তি? এদিন পূৰ্বেই উপস্থিত মমতা

কঠিন প্ৰত্যাহ্বান গ্ৰহণ কৰি বিজেপিৰ আগ্ৰাসন উফৰাই আদিবাসী প্ৰধান ঝাৰখণ্ডৰ মুখ্য মন্ত্ৰী হিচাপে শপত ল’বলৈ সাজু হৈছে হেমন্ত চোৰেন।

দেওবাৰে চোৰেন দেশৰ কনিষ্ঠতম মুখ্য মন্ত্ৰী হিচাপে শপত গ্ৰহণ কৰিব। শপত গ্ৰহণ অনুষ্ঠানত নিমন্ত্ৰিত অতিথিৰ তালিকাত কোন কোন থাকিব তাক লৈয়েই এতিয়া চৰ্চা চলিছে।

যোৱা ২৩ ডিচেম্বৰত ঝাৰখণ্ডত কংগ্ৰেছ, জেএমএম, আৰজেডি জোঁটৰ বিজয় সাৱ্যস্ত হোৱাৰ সময়ত ঝাৰখণ্ড মুক্তি মৰ্চাৰ নেতা হেমন্ত চোৰেনক বিভিন্ন নেতাই শুভেচ্ছা জনাইছিল।

এতিয়া দেওবাৰে চোৰেনৰ শপত গ্ৰহণ অনুষ্ঠানত এনে বহু নেতাৰ যোগদান নিশ্চিত হোৱা বুলি গম পোৱা গৈছে।

ইতিমধ্যে, পশ্চিমবংগৰ মুখ্য মন্ত্ৰী মমতা বেনাৰ্জীয়ে সপত গ্ৰহণ অনুষ্ঠানত যোগদানৰ বাবে এদিন পূৰ্বেই গৈ ৰাঁচীত উপস্থিত হৈছেগৈ।

মমতাৰ উপৰি শপত গ্ৰহণ অনুষ্ঠানত বিভিন্ন বিজেপি বিৰোধী দলৰ নেতা উপস্থিত থকাৰ কথা।

সূত্ৰ অনুসৰি প্ৰাক্তন ৰাষ্ট্ৰপতি প্ৰনৱ মুখাৰ্জীকো অনুষ্ঠানলৈ নিমন্ত্ৰণ জনোৱা হৈছে। কংগ্ৰেছ সভানেত্ৰী ছোনিয়া গান্ধী, নেতা ৰাহুল গান্ধীকো জনোৱা হৈছে নিমন্ত্ৰণ।

হেমন্ত চোৰেনে তেওঁৰ শপত গ্ৰহণ অনুষ্ঠানলৈ নিমন্ত্ৰণ জনাইছে এন চি পি নেতা শাৰদ পাৱাৰ, বিএছপি নেত্ৰী মায়াৱতী, কংগ্ৰেছ নেত্ৰী প্ৰিয়ংকা গান্ধীৰ লগতে ৰাজস্থান তথা মধ্য প্ৰদেশৰ মুখ্যমন্ত্ৰীকো।

দেওবাৰে শপত গ্ৰহণ অনুষ্ঠানত এই নেতাসকলৰ কোন কোন উপস্থিত থাকে সেয়া লক্ষণীয় হৈ পৰিছে।

হেমন্ত চোৰেনৰ দেওবাৰৰ শপত গ্ৰহণ অনুষ্ঠান অন্য এক দিশৰ পৰাও তাৎপৰ্যপূৰ্ণ হিচাপে বিবেচিত হৈছে। নাগৰিকত্ব সংশোধনী আইন গৃহীত হোৱাৰ পাছত বিজেপি বিৰোধী দলবিলাকৰ মাজত সমন্বয় গঢ়ি তোলাৰ মঞ্চ হিচাপেও গঢ়ি উঠিব পাৰে চোৰেনৰ শপত গ্ৰহণ মঞ্চ।

ৰাঁচীৰ হেমন্ত চোৰেনৰ শপত গ্ৰহণ অনুষ্ঠান নাগৰিকত্ব সংশোধনী আইন, এন আৰ চি বিৰোধী আন্দোলনক শক্তিশালী কৰি তোলাৰ এক সুযোগ হ’ব পাৰে বিৰোধীসকলৰ বাবে। বিৰোধীয়ে এই সুযোগ অৱশ্যেই এৰি দিব নিবিচাৰিব।

মমতাৰ উপৰি ছোনিয়া গান্ধী, শাৰদ পাৱাৰকে ধৰি বিভিন্ন বিৰোধী নেতাৰ উপস্থিতি গুৰুত্বপূৰ্ণ বুলি বিবেচিত হৈছে। সেয়েহে, ৰাঁচীত হেমন্ত চোৰেনৰ শপত গ্ৰহণ অনুষ্ঠানলৈ ৰাজনৈতিক মহলে দৃষ্টি ৰাখিছে।