পৰেশ বৰুৱাৰ দাবী অস্বীকাৰ প্ৰফুল্ল মহন্তৰ

প্ৰফুল্ল কুমাৰ মহন্তই দেওবাৰে আলফা (স্বাধীন) সেনাপ্ৰধান পৰেশ বৰুৱাৰ শেহতীয়া এক মন্তব্যৰ সত্যতা অস্বীকাৰ কৰিছে।

আলফাৰ সহায়েৰে মহন্ত ’৯৬ত দ্বিতীয়বাৰ ক্ষমতালৈ আহিছিল বুলি বৰুৱাই অসমৰ টি ভি বাতৰি চেনেল এটাত শেহতীয়াকৈ মন্তব্য কৰিছিল।

প্ৰাক্তন মুখ্য মন্ত্ৰী মহন্তই এক জনসভাত কয়, “অসম গণ পৰিষদে চৰকাৰ কৰিবলৈ আলফাৰ সহায় লোৱা নাছিল, বৰঞ্চ সেই সময়ত বহু নিৰ্দোষী মানুহৰ লগতে অগপ নেতাকো আলফাই হত্যা কৰিছিল।”

তেজপুৰ নপামত নৰ্থইষ্ট মাইনৰিটি ষ্টুদেণ্টছ ইউনিয়নৰ সভাত মহন্তই এই মন্তব্য কৰিছে।

সভাত মহন্তই তেওঁৰ বিৰুদ্ধে মন্ত্ৰী হিমন্ত বিশ্ব শৰ্মাই শেহতীয়াকৈ তোলা অভিযোগো নাকচ কৰে।

মহন্ত ’৮৫ আৰু ’৯৬ত দুবাৰৰ বাবে অগপৰ পৰা পূৰ্ণাংগ পাঁচ বছৰৰ বাবে অসমৰ মুখ্য মন্ত্ৰীৰ দায়িত্বত আছিল।