মেলবৰ্ণত অনুষ্ঠিত হ’বলগীয়া ইণ্ডিয়ান ফিল্ম ফেষ্টিভেললৈ তিনিটা শিতানত মনোনয়ন লাভ ‘ভগা খিৰিকী’ৰ

অষ্ট্ৰেলিয়াৰ মেলবৰ্ণত অনুষ্ঠিত হ’বলগীয়া ইণ্ডিয়ান ফিল্ম ফেষ্টিভেললৈ শ্ৰেষ্ঠ চলচ্চিত্ৰ, শ্ৰেষ্ঠ পৰিচালক আৰু শ্ৰেষ্ঠ অভিনেত্ৰীৰ বাবে মনোনয়ন লাভ কৰিছে বিশিষ্ট পৰিচালক জাহ্নু বৰুৱা পৰিচালিত ‘ভগা খিৰিকিয়ে’।

আগষ্টৰ ৯ তাৰিখৰ পৰা ১৭ তাৰিখলৈ মেলবৰ্নত অনুষ্ঠিত হ’বলগীয়া ইণ্ডিয়ান ফিল্ম ফেষ্টিভেললৈ তিনিটা শিতানত অসমীয়া চলচ্চিত্ৰ ভগা খিৰিকীয়ে মনোনয়ন লাভ কৰাত উৎফুল্লিত হৈ পৰিছে অসমীয়া চলচ্চিত্ৰ প্ৰেমীসকল।

আনহাতে, ভগা খিৰিকী শ্ৰেষ্ঠ অভিনেত্ৰীৰ বাবে মনোনয়ন লাভ কৰাৰ লগে লগে জনপ্ৰিয় অভিনেত্ৰী জেৰিফা ৱাহিদৰ নামটো মনোনয়ন হ’ল। জেৰিফাই ভগা খিৰিকীৰ অভিনেত্ৰীৰ মূল ভূমিকাত অভিনয় কৰিছিল। জেৰিফা ৱাহিদৰ লগতে শ্ৰেষ্ঠ অভিনেত্ৰীৰ দৌৰত আছে বলীউদৰ জনপ্ৰিয় অভিনেত্ৰী আলিয়া ভাট (গালি বয়), টাবু (অন্ধ ধুন), নিনা গুপ্তা (বধায়ে হো) আৰু ঋতুপৰ্না সেন।

ইণ্ডিয়ান ফিল্ম ফেষ্টিভেললৈ মনোনীত হোৱাৰ পাছতে আনন্দিত হৈ পৰিছে অভিনেত্ৰী জেৰিফা ৱাহিদ। সাংবাদিকৰ আগত জেৰিফাই বলীউদৰ ভাল ভাল অভিনেত্ৰীসকলৰ সৈতে তেওঁৰ নামটো বিবেচিত হোৱাটোৱে ডাঙৰ কথা বুলি মন্তব্য কৰে।

উল্লেখযোগ্য যে, শ্ৰেষ্ঠ পৰিচালকৰ বাবে চলচ্চিত্ৰখনৰ পৰিচালক জাহ্নু বৰুৱায়ো মনোনয়ন লাভ কৰিছে।