নৱবৰ্ষৰ প্ৰথম দিনটোতে “আমি কা নামানো, কেতিয়াও নামানো” বুলি সংকল্প ল’বলৈ জনসাধাৰণক আছু-৩০টা জনগোষ্ঠীয় সংগঠনৰ আহ্বান

সদৌ অসম ছাত্ৰ সন্থা আৰু ৩০টা জনগোষ্ঠীয় সংগঠনে অসমৰ জনসাধাৰণক আজি নতুন বছৰ (২০২০)ৰ প্ৰথম দিনটোতে “আমি কা নামানো, কেতিয়াও নামানো” বুলি সংকল্প ল’বলৈ আহ্বান জনাইছে।

সংগঠনকেইটাই নৰ্থ-ইষ্ট নাওলৈ প্ৰেৰণ কৰা এটা যুটীয়া বিবৃতিত অসমৰ প্ৰতিটো পৰিয়াললৈ জনোৱা এই আহ্বান অসমৰ সুৰক্ষিত ভৱিষ্যত নিশ্চিত কৰাৰ বাবে বুলি কোৱা হৈছে।

বিবৃতিটোত লগতে সংগঠনকেইটাই আজি সন্ধিয়া নিজৰ নিজৰ ঘৰৰ পদূলিত বন্তি প্ৰজ্বলন কৰি CAA-বিৰোধী আন্দোলনত প্ৰাণ আহুতি দিয়া ৫জন চহিদৰ প্ৰতি শ্ৰদ্ধাঞ্জলি জনাবলৈ ৰাইজলৈ আহ্বান জনাইছে।

ৰত্ন ওজাৰ প্ৰতি শ্ৰদ্ধাঞ্জলি আছুৰ

ইপিনে সদৌ অসম ছাত্ৰ সন্থাই জনাইছে যে ৩১ ডিচেম্বৰত সংগঠনটোৱে প্ৰসিদ্ধ সাংস্কৃতিক কৰ্মী, নাট্যকাৰ, সাহিত্যিক তথা অভিনেতা ৰত্ন ওজাৰ মৃত্যুত গভীৰ শোক প্ৰকাশ কৰে।

৩১ ডিচেম্বৰত মৃত্যু হোৱা ওজাৰ মৃত্যুৰ খবৰ পোৱাৰ লগে লগে সংগঠনটোৰ উপদেষ্ট সমুজ্জ্বল কুমাৰ ভট্টাচাৰ্য্য আৰু সভাপতি দীপাংক নাথে বাসভৱনলৈ যায় আৰু লোক সাহিত্যৰ সাধকজনলৈ শ্ৰদ্ধাঞ্জলি জনোৱাৰ উপৰি পৰিয়ালটোক সমবেদনা জনায়। তেওঁৰ মৃত্যু অসমৰ বাবে অপূৰণীয় ক্ষতি আখ্যা দিয়ে সংগঠনটোৱে।

অসম আন্দোলনত সমুখৰ পৰা নেতৃত্ব দিয়া ৰত্ন ওজাই CAA-বিৰোধী আন্দোলনতো হুইল চেয়াৰত আহি ৰাইজক নেতৃত্ব, অভিভাৱকত্ব, সাহস, শক্তি প্ৰদান কৰিছিল, বিবৃতিটোত সদৌ অসম ছাত্ৰ সন্থাই কয়।

ওজাৰ মৃতদেহ ছাত্ৰ সন্থাৰ শ কঢ়িওৱা যানত তুলি কলাক্ষেত্ৰ, পুথিভঁৰাল, ৰবীন্দ্ৰ ভৱন আদিলৈ নিয়া হয় আৰু তাৰ পিছত চহিদ ভৱনলৈ আনি আছুৰ পতাকাৰে শেষ শ্ৰদ্ধা জনায় সংগঠনটোৱে।