আলফা নেতা জিতেন দত্তৰ জামিন মঞ্জুৰ; দেওবাৰে মুকলি আকাশৰ তললৈ অহাৰ সম্ভাৱনা

‘কা’ বিৰোধী আন্দোলনত জড়িতৰ অভিযোগত গ্ৰেপ্তাৰ হোৱা আলফা নেতা জিতেন দত্তই জামিন লাভ কৰিছে। তিনিচুকীয়া-মাৰ্ঘেৰিটাৰ সত্ৰ ন্যায়াধীশৰ আদালতে জিতেন দত্তৰ জামিন মঞ্জুৰ কৰে। আলফা নেতা গৰাকীৰ বিৰুদ্ধে ৰুজু হৈছিল দুটাকৈ গোচৰ।

আলফা নেতা গৰাকী কাইলৈ অৰ্থাৎ ৫ জানুৱাৰীত মুকলি আকাশৰ তললৈ অহাৰ সম্ভাৱনা আছে। ‘কা’ বিৰোধী আন্দোলনত জড়িত থকাৰ বাবেই আলফা নেতা গৰাকীক ১৪ ডিচেম্বৰত আৰক্ষীয়ে ডিগবৈৰ বাসগৃহৰ পৰা গ্ৰেপ্তাৰ কৰিছিল।

ইয়াৰ পিছতে ‘কা’ বিৰোধী প্ৰতিবাদৰ সময়ত তিনিচুকীয়া জিলাৰ মাৰ্ঘেৰিটা থানাৰ অন্তৰ্গত ভিনাৰ মিলস্থিত আৰ এছ এছৰ এটা কাৰ্যালয় ভাঙি লণ্ডভণ্ড কৰাৰ অভিযোগত আলফা নেতা জিতেন দত্তক ২৩ ডিচেম্বৰত মাৰ্ঘেৰিটাৰ মহকুমা ন্যায়িক দণ্ডাধীশৰ আদলতত হাজিৰ কৰাই তিনিচুকীয়া কাৰাগাৰলৈ প্ৰেৰণ কৰিছিল।

বৰ্তমান দুয়োটা গোচৰৰ পৰাই আলফা নেতা জিতেন দত্তই জামিন মঞ্জুৰ কৰিছে আৰু কাইলৈ দত্ত মুকলি আকাশৰ তললৈ আহিব বুলি জানিব পৰা গৈছে।