অসমীয়া চিনেমাক বাংলা চিনেমা বুলি দেখুৱাই আনন্দবাজাৰ পত্ৰিকাৰ বিনোদন

কলকাতাৰ এখন আগশাৰীৰ বাংলা বাতৰিকাকত আনন্দবাজাৰ পত্ৰিকাৰ ৭জানুৱাৰি সংখ্যাৰ বিনোদন পৃষ্ঠাত এক আমোদজনক খবৰ প্ৰকাশ পাইছে।

বাতৰিটোত বাংলা চলচ্চিত্ৰক আন্তৰ্জাতিক মঞ্চলৈ লৈ যোৱাৰ বাবে চহৰখনত অনুষ্ঠিত চলচ্চিত্ৰ মহোৎসৱৰ কথা লিখা হৈছে।

আশ্চৰ্যজনকভাৱে, বাতৰিটোৰ সৈতে যিখন ফটো সংলগ্ন কৰা হৈছে, সেইখন হৈছে বিশিষ্ট অসমীয়া চলচ্চিত্ৰ পৰিচালক ৰীমা দাসৰ বুলবুল কেন ছিং ছবিখনৰ।

এইদৰে কলকাতাৰ প্ৰতিষ্ঠিত কাকত এখনে বহুল চৰ্চিত এখন  অসমীয়া ছবিৰ ফটো সংলগ্ন কৰি বাংলা ছবিৰ প্ৰম’চনৰ বাতৰি পৰিৱেশন কৰিলে, সেয়া অতি দুৰ্ভাগ্যজনক।

উল্লেখযোগ্য যে ইয়াৰ আগেয়েও একাংশ বাংলা সংবাদ মাধ্যমে চলচ্চিত্ৰ পৰিচালক ৰীমা দাস আৰু এথলেট হিমা দাসক বঙালী বুলি কৈ পাছত ক্ষমা খুজিব লগীয়া হৈছিল।

আনন্দবাজাৰৰ বাতৰিটোত অসমীয়া ছবিৰ সম্পৰ্কত এটা শব্দও লিখা হোৱা নাই কিম্বা বাংলা আৰু অসমীয়া ছবিৰ সম্পৰ্কৰ কোনো কথাও সন্নিবিষ্ট নাই।

তেনেস্থলত জনপ্ৰিয় তথা বহু চৰ্চিত এখন অসমীয়া ছবিৰ ফটো সংলগ্ন কৰি বাংলা ছবিৰ বন্দনা কৰাটোত কি উদ্দেশ্য থাকিব পাৰে?

বাতৰিটোত উল্লেখ কৰা অনুসৰি ৫ জানুৱাৰিৰ পৰা কলকাতাত আৰম্ভ হোৱা আৰ্ট হাউছ এছিয়া চলচ্চিত্ৰ উৎসৱত বাংলা ছবি জগতৰ জনপ্ৰিয় অভিনেতা প্ৰসেনজিতে বক্তব্য ৰাখিছে।

অভিনেতা প্ৰসেনজিতৰ বক্তৱ্যৰ ভিডিঅ’টো বাতৰিটোৰ সৈতে সংলগ্ন কৰা হৈছে। কিন্তু  ভিডিঅ’টোত ক’তো এবাৰো প্ৰসেনজিতে ৰীমা দাসৰ নাম বা বুলবুল কেন ছিঙৰ কথা উল্লেখ কৰা নাই।

স্বাভাৱিকতে, কলকাতা তথা দেশৰ এখন আগশাৰীৰ বাংলা কাকতে কোনো যুক্তি নোহোৱাকৈ অসমীয়া ছবি এখনক বাংলা বুলি দেখুৱাই অসম তথা অসমীয়াক হেয় প্ৰতিপন্ন কৰিব বিচাৰিছে নেকি বুলি বিদ্বৎ সমাজত প্ৰতিক্ৰিয়াৰ সৃষ্টি হৈছে।