অসমৰ এটা খৰ্গৰ গঁড়ৰ দুশিঙীয়াকৰণ এ চি এৰ

ভাৰত-শ্ৰীলংকাৰ দেওবাৰৰ প্ৰথম টি২০ মেচত লজ্জাজনক “স্কুলীয়া ছাত্ৰৰ ভুল”ৰ পিছত পোহৰলৈ আহিছে অসম ক্ৰিকেট এচচিয়েচনে ৰাজ্যৰ বিশ্বখ্যাত এশিঙীয়া গঁড়ত “দ্বিতীয় খৰ্গ” যোগ দিয়াৰ কাহিনী।

বৰ্ষাপাৰা ষ্টেডিয়ামত গ্ৰাউণ্ড ষ্টাফে হেয়াৰ ড্ৰায়াৰ, ভেকুৱাম ক্লীনাৰ আৰু ষ্টীম আইৰন ব্যৱহাৰ কৰি ক্ৰীজ শুকুৱাবলৈ চেষ্টা কৰাৰ ফলত এ চি এ শ’লঠেকত পৰিছিল।

বি চি চি আইৰ লগতে আকাশ চোপ্ৰা, হৰভজন সিং আৰু ভি ভি এছ লক্ষ্মণকে ধৰি ধাৰভাষ্যকাৰসকলে ক্ৰীজত “পানী সোমোৱা”ৰ বাবে এ চি এক সমালোচনা কৰিছিল।

এইবাৰ এ চি এই দেখুৱাইছে যে অসমৰ ৰাজ্যিক জন্তু এশিঙীয়া গঁড় দেখাত কেনে তেওঁলোকৰ কোনো ধাৰণা নাই।

মুম্বাইৰ অমটেক্স স্প’ৰ্টছৱেৰে প্ৰস্তুত কৰা অসম ক্ৰিকেট দলৰ ২০১৯-২০ বৰ্ষৰ হালধীয়া-ক’লা জাৰ্ছিটোত বুকুৰ ফালে এটা গঁড়ৰ ছবি যোগ দিয়া হৈছে।

আশ্চৰ্য্যজনকভাৱে, এ চি এৰ গঁড়টোৰ দুটা খৰ্গ আছে, আৰু নিশ্চিতভাৱে ই অসমক প্ৰতিনিধিত্ব নকৰে। বৰঞ্চ, ই হৈছে এফ্ৰিকান গঁড়।

অসম ক্ৰিকেট এচচিয়েচনে এনে এক ভুল কিয় কৰিলে? আৰু ই কেনেকৈ নেদেখাকৈ থাকি গ’ল?

এ চি এৰ জ্যেষ্ঠ বিষয়াক মন্তব্য গ্ৰহণৰ বাবে পোৱা হোৱা নাই। বিভাগীয় ৱেবছাইট www.assamcricket.comত উপলব্ধ ফোন নম্বৰ 0361- 249030 এক ইনভেলিড নম্বৰ, কম্পিউটাৰাইজড ভইচে কয়।

অমটেক্স স্প’ৰ্টছৱেৰৰ বিষয়া নিশাদ ক’ৰাক যোগাযোগ কৰাত, নৰ্থইষ্ট নাওক জনায় যে জাৰ্ছিটোৰ ডিজাইনত এ চি এই অনুমোদন জনাইছিল।

“আমাৰ সঞ্চালক কুনাল পেটেল আন ডিজাইনাৰসকলৰ সৈতে অসম ক্ৰিকেট এচচিয়েচনক ডিজাইনটো দেখুৱাবলৈ গুৱাহাটীলৈ গৈছিল,” নিশাদ ক’ৰাই জনায়।

ডিজাইনসমূহত অনুমোদন জনোৱাৰ পিছতহে অসম ক্ৰিকেট দলৰ জাৰ্ছিসমূহ প্ৰস্তুত কৰা হৈছিল।

অৱশ্যে, অসমৰ ৰাজ্যিক জন্তুটোক এফ্ৰিকান গঁড়ৰ ৰূপত দেখুৱাটোত অসমৰ বন্যপ্ৰাণী বিশেষজ্ঞসকল অলপো হৰ্ষোল্লিত হোৱা নাই।

“অসম ক্ৰিকেট দলৰ টি-শ্বাৰ্টত দুশিঙীয়া গঁড় দেখি আমি আচৰিত আৰু আচম্বিত হৈছো,” গুৱাহাটীৰ বন্যপ্ৰাণী সংৰক্ষণ সংগঠন আৰণ্যকৰ প্ৰতিষ্ঠাপক আৰু চি ই অ’ বিভৱ তালুকদাৰে কয়।

IUCNৰ এছিয়ান গঁড় বিশেষজ্ঞ গোটৰো অধ্যক্ষ তালুকদাৰে কয় যে এশিঙীয়া গঁড়ৰ নামটোৱেই এটা খৰ্গ থকাটো সূচায়।

“সম্ভৱতঃ দুশিঙীয়া গঁড় থকা দেশৰ পৰা স্প’ৰ্টছ শ্বাৰ্টসমূহ আমদানি কৰা হৈছে। অসমৰ ৰাজ্যিক জন্তুৰূপে গঁড়ে সম্ভৱতঃ ক্ৰীড়া আয়োজকসকলৰ মাজত অধিক সজাগতাৰ প্ৰয়োজন,” তেওঁ কয়।