বড়োসকলক দিয়া নহয় য়ু টি চি; চুক্তিত থাকিব ৰাজনৈতিক অধিকাৰ আৰু অৰ্থনৈতিক পেকেইজ : গৃহ মন্ত্ৰ্যালয়ৰ সূত্ৰ

২৭ জানুৱাৰি, অৰ্থাৎ সোমবাৰে নতুন দিল্লীত কেন্দ্ৰীয় চৰকাৰ আৰু বড়ো বিদ্ৰোহী সংগঠন এন ডি এফ বিৰ সৈতে স্বাক্ষৰিত হ’ব লগীয়া বড়ো চুক্তিত বড়োসকলক কেন্দ্ৰশাসিত পৰিষদ দিয়া নহয়।

চুক্তিখন স্বাক্ষৰিত হ’বলৈ দুটা দিন বাকী থকা অৱস্থাত অসমত বড়ো চুক্তিক লৈ বিভিন্ন ধৰণৰ খবৰ ওলাই আছে, য’ত অসমৰ বুকুতে বড়োসকলৰ বাবে য়ু টি চি অৰ্থাৎ কেন্দ্ৰশাসিত পৰিষদ গঠন কৰা হ’ব বুলি প্ৰকাশ পোৱা বাতৰিও আছে।

এই বাতৰিবোৰৰ উল্লেখেৰে ৰাজ্যৰ বিজেপি চৰকাৰখনৰ মন্ত্ৰী হিমন্ত বিশ্বই আজি জনতা ভৱনত এখন সংবাদ মেলত য়ু টি চিৰ প্ৰসংগত কৈছিল যে ৰাজ্যখনত কোনো য়ু টি গঠন নহয়।

শেহতীয়াকৈ গৃহ মন্ত্ৰ্যালয়ৰ এটা সূত্ৰৰ পৰা জানিব পৰা গৈছে যে ২৭ জানুৱাৰিত বড়ো বিদ্ৰোহী সংগঠন এন ডি এফ বিৰ সৈতে হ’ব লগীয়া চুক্তিত বড়োসকলৰ বাবে ৰাজনৈতিক অধিকাৰ আৰু অৰ্থনৈতিক পেকেইজহে থাকিব। কোনো কেন্দ্ৰশাসিত পৰিষদ (UTC) নাথাকে।

অৱশ্যে এই ৰাজনৈতিক অধিকাৰ কেনে পৰ্য্যায়ৰ হ’ব সেই কথা স্পষ্ট কৰা নাই সূত্ৰটোৱে।

উল্লেখযোগ্য যে বড়োসকলৰ বাবে স্বাধীন বড়োলেণ্ড বিচাৰি প্ৰায় চাৰে তিনি দশক ধৰি সশস্ত্ৰ আন্দোলন কৰি আহিছে। বড়োসকলৰ বাবে এখন স্বাধীন দেশ গঠনৰ স্বপ্নেৰে ১৯৮৬ চনত ৰঞ্জন দৈমাৰীৰ দ্বাৰা এন ডি এফ বি গঠন কৰা হৈছিল (বড়ো ছিকিউৰিটি ফ’ৰ্চ নামেৰে)।

যোৱা এপষেকৰ ভিতৰত বিদ্ৰোহী সংগঠনটোৰ আটাইকেইটা গোটৰ সৈতে কেন্দ্ৰীয় চৰকাৰে শান্তি আলোচনা কৰি চুক্তি কৰাৰ সিদ্ধান্ত লয়।

আনপিনে য়ু টি চি গঠন হ’ব বুলি প্ৰকাশিত বাতৰিৰ প্ৰতিক্ৰিয়া দি সংবাদ মাধ্যমৰ আগত চতিয়াৰ বিজেপি বিধায়ক পদ্ম হাজৰিকাই কয় যে য়ু টি চি গঠন হ’লে আৰু তাত শোণিতপুৰৰ অংশ অন্তৰ্ভুক্ত কৰিলে তেওঁ প্ৰতিবাদ কৰিব।

বিষয়টো স্পষ্ট কৰিবলৈ তেওঁ মুখ্য মন্ত্ৰী সোণোৱাল আৰু বিত্ত মন্ত্ৰী হিমন্তক আহ্বান জনাইছিল।