মোদীৰ অসম ভ্ৰমণৰ প্ৰাকক্ষণত গুৱাহাটী মহানগৰীত দুটাকৈ IED উদ্ধাৰ

মোদীৰ অসম ভ্ৰমণলৈ মাজত এটা দিন থকা অৱস্থাতে গুৱাহাটী মহানগৰীত বুধবাৰে নিশা দুটাকৈ IED উদ্ধাৰ হৈছে। এক গোপন সূত্ৰৰ পৰা লাভ কৰা খবৰৰ ভিত্তিত নিশা প্ৰায় ১০-১০ ৩০ বজাৰ ভিতৰত আৰক্ষীয়ে IED দুটা উদ্ধাৰ কৰে।

প্ৰথমটো IED পানবজাৰ মহেন্দ্ৰ মোহন চৌধুৰী হাস্পতালৰ সমীপত মোনাত ভৰাই থোৱা অৱস্থাত উদ্ধাৰ হোৱাৰ বিপৰীতে আনটো পল্টনবজাৰ আৰক্ষী থানাৰ পৰা প্ৰায় ৫০ মিটাৰ নিলগত গুৱাহাটী ৰেইলৱে ষ্টেচনলৈ সোমোৱা পথৰ সমীপত হৰলিক্সৰ টেমাত উদ্ধাৰ হয়।

আৰক্ষীয়ে প্ৰাথমিক তদন্তত আলফা স্বাধীনে এই IED ৰখা বুলি সন্দেহ কৰিছে। আৰক্ষী আয়ুক্ত মুন্না দাস গুপ্তাই জনাইছে এই কথা। অৱশ্যে বোমা দুটা বেছি শক্তিশালী নাছিল বুলি দাবী আৰক্ষী আয়ুক্তৰ।

কিন্তু প্ৰশ্ন হয় নিৰাপত্তাৰ নামত গিজগিজাই থকা মহানগৰ আৰক্ষীৰ চকুত ধূলি দি কেনেকৈ পল্টনবজাৰ আৰু পানবজাৰ আৰক্ষী থানাৰ সমীপতে ভয়ংকৰ কুটাঘাটৰ পৰিকল্পনা কৰিব পাৰিলে কুটাঘাটকাৰীয়ে?

ঘটনা সন্দৰ্ভত মহানগৰ আৰক্ষীয়ে ইতিমধ্যে আৰম্ভ কৰিছে তদন্ত।