কিছুমান মানুহক কুকুৰে কিয় বেছিকৈ ভুকে বা খেদে? কাৰণবোৰ জানি উপকৃত হ’ব পাৰে আপুনি

সকলো অচিনাকি মানুহৰ প্ৰতি কুকুৰৰ প্ৰতিক্ৰিয়া একে নহয়। এইটো প্ৰায়ে দেখা সত্য যে কিছুমান মানুহক দেখিলে কুকুৰে বেছিকৈ ভুকে আৰু কিছুমানক সিমান নুভুকে।

কুকুৰৰ এই আচৰিত আচৰণটোৰ বিষয়ে সাধাৰণ মানুহৰ উৎসুকতা থকাৰ উপৰি প্ৰাণীৰ আচৰণ সম্পৰ্কীয় অধ্যয়নৰো ই এটা দিশ।

সাধাৰণভাৱে অচিনাকি মানুহ দেখিলেই কুকুৰে অত্যধিক ভুকা আচৰণটোৰ অনুপযুক্তভাৱে সামাজিককৰণ (poor socialization)ৰ সৈতে সম্পৰ্ক আছে। কুকুৰ এটা পোহা বা ডাঙৰ কৰা প্ৰক্ৰিয়াটোত তাক উপযুক্তভাৱে বিভিন্ন মানুহৰ সংগ নিদিয়া বাবে এয়া হয়।

ৰাস্তাত মুকলিকৈ ঘূৰি ফুৰা কুকুৰতকৈ বান্ধত থকা বা পোহনীয়া কুকুৰে মানুহক অধিক ভুকা আৰু আক্ৰমণ কৰাটোৱেও এই অনুপযুক্তভাৱে সামাজিককৰণ (poor socialization)ৰ সূত্ৰটো প্ৰমাণ কৰে।

কিন্তু সামাজিককৰণ উপযুক্তভাৱে হোৱা কুকুৰেও কিছুমান লোকৰ প্ৰতি আন কিছুমানতকৈ অধিক আক্ৰমণাত্মক হয় আৰু ভুকে, খেদে বা কামোৰে।

ইয়াৰ এটা সৰ্বসন্মত কাৰণ বিচাৰি উলিয়াব পৰা নাই যদিও কুকুৰৰ এই আচৰণৰ আঁৰত যে ব্যক্তিৰ পৰা বাৰ্তা হিচাপে যোৱা ভিন্ন ধৰণৰ মানসিক অৱস্থাৰ ছিগনেল সেয়া প্ৰায়সকলেই মানি লৈছে।

প্ৰায়সকল অধ্যয়নকাৰীয়েই কোৱা কথাটো হ’ল- অচিনাকি কুকুৰ এটা দেখি মানুহৰ মানসিক অৱস্থাৰ পৰিৱৰ্তন হয়। যেতিয়া মানুহ এজন হঠাতে ভীতিৰ মুখামুখি হয়, তেতিয়া শৰীৰে বিভিন্ন ধৰণৰ হৰম’ন আৰু অন্যান্য ধৰণৰ দেহৰস নিঃসৰণ কৰে।

এইবোৰ অত্যন্ত সূক্ষ্ম অনুভূতিশীল কুকুৰে ছিগনেল হিচাপে অনুধাৱন কৰিব পাৰে। যদিও veterinary medical community-ৰ মাজত ইয়াৰ সত্যতাক লৈ ভিন্নমত আছে, ২০১৭ চনত প্ৰকাশিত এটা অধ্যয়নেও এই কথাটোক সমৰ্থন কৰিছে।

অধ্যয়নটোত ভীতিগ্ৰস্ত মানুহ আৰু সুখী অৱস্থাত থকা মানুহৰ উদ্দীপক (stimuli) সংগ্ৰহ কৰি বেলেগ বেলেগ কুকুৰৰ বাবে দি চোৱা হৈছিল। পৰীক্ষাটোত ভীতিগ্ৰস্ত মানুহৰ উদ্দীপক দিয়া কুকুৰকেইটাৰ আচৰণ আনকেইটাতকৈ বহুগুণে চাপযুক্ত (stressful) হিচাপে বাণীবদ্ধ হয়। অধ্যয়নটোৱে এই ইংগিত দিছে যে ভীতিগ্ৰস্ত এজন লোকক কুকুৰে চিনাক্ত কৰিব পাৰে।

গতিকে ভীতিগ্ৰস্ত লোক এজনৰ উপস্থিতিত কুকুৰটোৱে নিজৰ বা তাৰ গৰাকীৰ নিৰাপত্তাহীনতা বা বিপদ অনুভৱ কৰে আৰু ভুকে বা আক্ৰমণ কৰিব খোজে। আনকি পূৰ্বে লগ পোৱা মানুহ এজনৰ প্ৰতিও কুকুৰটোৱে এনেকুৱা আচৰণ কৰিব পাৰে, যদিহে তাৰ পূৰ্বৰ অভিজ্ঞতা এই ধৰণৰ হয়। কুকুৰটোক কিবা প্ৰকাৰে সম্পূৰ্ণ আশ্বস্ত নকৰা পৰ্য্যন্ত মানুহজনৰ প্ৰতি তাৰ আচৰণৰ পৰিৱৰ্তন সাধাৰণতে নঘটে।