১৯৯৩ৰ মুম্বাইৰ ধাৰাবাহিক বিস্ফোৰণৰ অভিযুক্ত নিৰুদ্দেশ

১৯৯৩ চনৰ মুম্বাইৰ ধাৰাবাহিক বিস্ফোৰনৰ ৬৮ বছৰীয়া অভিযুক্ত জালিছ আনছাৰী প্যেৰোলত থকা অৱস্থাত বৃহস্পতিবাৰে পুৱাৰ পৰা নিৰুদ্দেশ হৈ থকা বুলি জানিব পৰা গৈছে।

যাৱৎজীৱন কাৰাবাস খাটি থকা দক্ষিণ মুম্বাইৰ মমিনপুৰাৰ নিবাসী জালিছ আনছাৰীয়ে দেশৰ বিভিন্ন প্ৰান্তত সংঘটিত বোমা বিস্ফোৰণৰ সৈতে জড়িত আছিল বুলি এটা সূত্ৰই প্ৰকাশ কৰে।

ৰাজস্থানৰ আজমেৰ কেন্দ্ৰীয় কাৰাগাৰৰ পৰা ২১ দিনৰ প্যেৰোল লাভ কৰা আনছাৰীয়ে ১৭ জানুৱাৰি অৰ্থাৎ আজি কাৰাগাৰ কৰ্তৃপক্ষৰ ওচৰত আত্মসমৰ্পণ কৰাৰ কথা আছিল বুলিও সূত্ৰটোৱে জনায়।

প্যেৰোলত থকা সময়কালত আনছাৰিক প্ৰতিদিনে আগ্ৰীপাডা আৰক্ষী থানাত ৰাতিপুৱা ১০.৩০ বজাৰ ১২ বজাৰ ভিতৰত হাজিৰ হ’বলৈ নিৰ্দেশ দিয়া হৈছিল।

কিন্তু বৃহস্পতিবাৰে থানাত হাজিৰ নহ’ল আনছাৰি। ইয়াৰ পিছতে সন্ধিয়া আনছাৰিৰ ৩৫ বছৰীয়া পুত্ৰ জাইদ আনছাৰীয়ে দেউতাক নিৰুদ্দেশ হৈ থকা বুলি থানাত গোচৰ দিয়া বুলি আৰক্ষী সূত্ৰই জনায়।

আৰক্ষীক দিয়া গোচৰ অনুসৰি, জালিছ আনছাৰীয়ে ৰাতিপুৱা সোনকালে বিচনাৰ পৰা উঠি পৰিয়ালৰ লোকক নামাজ পঢ়িব যাম বুলি কৈ ওলাই গৈছিল, কিন্তু ঘৰলৈ উভতি নাহিল।

ইফালে আনছাৰীৰ পুত্ৰৰ অভিযোগৰ ভিত্তিত আগ্ৰাপাডা আৰক্ষীয়ে নিৰুদ্দেশৰ গোচৰ ৰুজু কৰে।

মুম্বাই আৰক্ষীৰ ক্ৰাইম ব্ৰাঞ্চ আৰু মহাৰাষ্ট্ৰ এ টি এছে আনছাৰীৰ সন্ধানত ইতিমধ্যে অভিযান আৰম্ভ কৰিছে বুলি জানিব পৰা গৈছে।

SIMI আৰু ইণ্ডিয়ান মুজাহিদীনৰ দৰে সন্ত্ৰাসবাসী সংগঠনৰ সৈতে জড়িত থকা জালিছ আনছাৰী ‘ডক্টৰ বম’ বুলিও পৰিচিত। তেওঁ বিভিন্ন সন্ত্ৰাসবাদী সংগঠনৰ সদস্যক বোমা বনোৱাৰো প্ৰশিক্ষণ প্ৰদান কৰিছিল।

২০০৮ চনৰ মুম্বাই বিস্ফোৰণৰ সৈতে জড়িত থকাৰ সন্দেহত আনছাৰীক ২০১১ চনত ৰাষ্ট্ৰীয় তদন্তকাৰী সংস্থা(NIA) ই জেৰা চলাইছিল।