আদালতৰ মজিয়াত প্রথমটো মুখ থেকেচা খালে ৰিপাব্লিক টিভিৰ মুখ্য সম্পাদক অৰ্ণৱ গোস্বামীয়ে

ৰিপাব্লিক টিভিৰ মুখ্য সম্পাদক অৰ্ণৱ গোস্বামীয়ে আদালতৰ মজিয়াত প্ৰথমটো মুখ থেকেচা খাইছে।

বুধবাৰে পুৱা নিজ বাসগৃহৰ পৰা আৰক্ষীয়ে আত্মহত্যা কৰিবলৈ প্ৰৰোচনা কৰাৰ অভিযোগৰ গোচৰত গ্ৰেপ্তাৰ কৰাৰ সময়ত তেওঁক আৰু তেওঁ পত্নীক শাৰীৰিকভাৱে আৰক্ষীৰ দলটোৱে অত্যাচাৰ কৰাৰ অভিযোগ তুলিছিল।

মহাৰাষ্ট্ৰৰ আলিবাগ আদালতত সাংবাদিক গোস্বামীয়ে আৰক্ষীৰ বিৰুদ্ধে এই অভিযোগ উত্থাপন কৰি প্ৰমাণ হিচাপে এটা ভিডিঅ’ ক্লীপিঙো দাখিল কৰিছিল।

অৰ্ণৱ গোস্বামীয়ে দাখিল কৰা ১৩ মিনিটৰ ভিডিঅ’টো পৰীক্ষা কৰি আদালতে তাত আৰক্ষীয়ে তেওঁক শাৰীৰিক অত্যাচাৰ কৰাৰ কোনো প্ৰমাণ নাই বুলি ঘোষণা কৰে।

ইফালে চিকিৎসকৰ স্বাস্থ্য পৰীক্ষাৰ প্ৰতিবেদনতো সাংবাদিক গৰাকীক আৰক্ষীয়ে শাৰীৰিক অত্যাচাৰ কৰাৰ কোনো প্ৰমাণ নথকাত আদালতে তেওঁৰ অভিযোগ খাৰিজ কৰি দিয়ে।

আনহাতে অৰ্ণৱ গোস্বামী আৰু তেওঁৰ পত্নীৰ বিৰুদ্ধে মুম্বাই আৰক্ষীয়ে কৰ্তব্যৰত মহিলা আৰক্ষী বিষয়াৰ ওপৰত শাৰীৰিক আক্ৰমণ আৰু আৰক্ষীৰ কৰ্তব্যত বাধা প্ৰদান কৰাৰ অভিযোগত এটা নতুন গোচৰ ৰুজু কৰিছে।

ইতিমধ্যে আলিবাগ আদালতে অৰ্ণৱ গোস্বামীক ১৪ দিনৰ ন্যায়িক জিম্মালৈ প্ৰেৰণ কৰিছে।

ইফালে অৰ্ণৱ গোস্বামীৰ অধিবক্তাই জামিনৰ বাবে বোম্বে উচ্চ ন্যায়ালয়ত আবেদন কৰিছে আজি তাৰ শুনানি লোৱাৰ কথা।

বোম্বে উচ্চ ন্যায়ালয়ে জামিন আবেদন খাৰিজ অথবা জামিন নামাঞ্জুৰ কৰিলে অহা ১৮ নৱেম্বৰলৈকে অৰ্ণৱ গোস্বামী কাৰাগাৰতে থাকিব লাগিব।