ক’ৰোনা ভাইৰাছৰ পৰা বিশ্বক প্ৰথম সতৰ্ক কৰি দিয়া চীনৰ চিকিৎসকগৰাকীৰ মৃত্যু

ক’ৰোনা ভাইৰাছ সম্পৰ্কে সৰ্ব প্ৰথম বিশ্বক সতৰ্ক কৰি দিয়া চিকিৎসক লী বেনলিয়াংগৰ বৃহস্পতিবাৰে মৃত্যু হয়।

চীনৰ চৰকাৰী বাতৰি কাকত গ্লোবেল টাইমছৰ বাতৰি অনুসৰি ডাঃ লী বেনলিয়াংগৰ মৃত্যুও ক’ৰোনা ভাইৰাছৰ ফলতে হৈছে।

যেতিয়া চীনৰ বুহান চহৰত ক’ৰোনা ভাইৰাছৰ খৱৰ লুকুৱাবলৈ চেষ্টা কৰা হৈছিল, তেতিয়া ডাঃ লী বেনলিয়াংগে হাস্পাতলৰ পৰা ভিডিঅ’ প’ষ্ট কৰি ক’ৰোনা ভাইৰাছ সম্পৰ্কে লোকক সজাগ কৰি দিছিল।

ইয়াৰ পাছত চীনৰ স্থানীয় স্বাস্থ্য বিভাগে ৩৪ বছৰীয়া ডাঃ লী বেনলিয়াংগক সোধপোছ কৰিছিল।

আনকি, বুহান আৰক্ষীয়ে ডাঃ লী বেনলিয়াংগলৈ জাননীও জাৰি কৰিছিল আৰু তেওঁক ছচিয়েল মিডিয়াৰ জৰিয়তে ভুল খৱৰ প্ৰচাৰ কৰাৰ বাবে দোষী সাৱ্যস্ত কৰিছিল।

ক’ৰোনা বাইৰাছত আক্ৰান্ত হোৱাৰ পাছত ডাঃ লী বেনলিয়াংগ যোৱা ১২ জানুৱাৰিত হাস্পাতালত ভৰ্তি হ’বলগীয়া হয়।

এজন ৰোগীৰ সংস্পৰ্শলৈ অহাৰ পাছতে তেওঁ ক’ৰোনা ভাইৰাছৰ দ্বাৰা আক্ৰান্ত হৈছিল।

ডাঃ লী বেনলিয়াংগে বিগত ৩০ ডিচেম্বৰত এক চ্যাট গ্ৰুপত তেওঁৰ সহযোগী চিকিৎসকলক এই ভাইৰাছৰ ভয়াবহতাৰ বিষয়ে লিখি খৱৰ প্ৰেৰণ কৰিছিল।

ডাঃ লী বেনলিয়াংগক তেওঁৰ বন্ধু চিকিৎকসকলক কৈছিল যে তেওঁ এই ভাইৰাছৰ পৰা হাত সাৰিবলৈ এক বিশেষ ধৰণৰ কাপোৰ পিন্ধে।

বিশ্ব স্বাস্থ্য সংস্থাই চীনৰ চিকিৎসক ডাঃ লী বেনলিয়াংগৰ মৃত্যুত শোক প্ৰকাশ কৰিছে।

আনহাতে, চীনৰ পৰা সংক্ৰমণ ঘটা ক’ৰোনা ভাইৰাছক লৈ ভাৰতত সম্পূৰ্ণ সতৰ্কতা অৱলম্বন কৰা হৈছে। চীন, জাপান, ছিংগাপুৰ আৰু থাইলেণ্ডৰ পৰা অহা লাখ লাখ যাত্ৰীৰ স্বাস্থ্য পৰীক্ষা কৰা হৈছে।