আজিৰে পৰা আইপিএফৰ অনিৰ্দিষ্টকালীন ডিমা হাচাও বন্ধ; কঠোৰ জিলা প্ৰশাসন

ইণ্ডিজেনাছ পিপুলচ ফ’ৰামে মঙ্গলবাৰৰ পৰা আহ্বান জনোৱা অনিৰ্দিষ্টকালীন ডিমা হাচাও জিলা বন্ধক কেন্দ্ৰ কৰি পাৰ্বত্য জিলাৰ সাধাৰণ ৰাইজৰ মাজত চেপা উত্তেজনা বিৰাজ কৰিছে।

অবশ্যে বন্ধ প্ৰত্যাহাৰৰ কাৰণে জিলা প্ৰশাসনৰ উপৰি অল এপেক্স বডি কোঅৰ্ডিনেশ্যন কমিটিৰ ফালৰ পৰা আইপিএফক আহ্বান জনোৱা হৈছে যদিও বন্ধ যে প্ৰত্যাহাৰ নহয় এয়া স্পষ্ট হৈ পৰিছে।

আইপিএফে নিজৰ দাবী সন্দৰ্ভত কোনো ধৰণৰ আপোচত মান্তি হোৱা নাই।

আজিৰ পৰা হাইস্কুল শিক্ষান্ত পৰীক্ষা আৰম্ভ হৈছে  আৰু অহা বুধবাৰৰ পৰা উচ্চতৰ মাধ্যমিক পৰীক্ষা অনুষ্ঠিত হ’ব।

এনে পৰিস্থিতিত ইণ্ডিজেনাছ পিপুলচ ফ’ৰামে অনিৰ্দিষ্টকালীন জিলা বন্ধ প্ৰত্যাহাৰৰ ক্ষেত্ৰত কোনো আগ্ৰহ দেখুওৱা নাই।

আইপিএফৰ সম্পাদক এল লিমা কেইভমে কয় যে সংবিধানৰ ষষ্ঠ অনুসূচীৰ অধীনত পৃথক জিলা গঠনৰ উপৰি পৃথক স্বায়ত্ত শাসিত পৰিষদ গঠনৰ দাবীত আইপিএফৰ দীঘলীয়া আন্দোলনৰ এক দশক সম্পূৰ্ণ হৈছে।

কিন্তু এতিয়ালৈকে চৰকাৰৰ ফালৰ পৰা কোনোও ব্যৱস্থা লোৱা নাই। অকল এয়াই নহয় চৰকাৰে গঠন কৰি দিয়া টাস্ক ফ’ৰ্চৰ প্ৰতিবেদনো কাৰ্যকৰী হোৱা নাই ।

ইপিনে বন্ধ প্ৰত্যাহাৰ আহ্বান জনাইছে অল এপেক্স বডি কোঅৰ্ডিনেশ্যন কমিটিয়ে। দেওবাৰলৈ জিলা প্ৰশাসনৰ সৈতে এপেক্স বডিৰ প্ৰতিনিধি দলে বৈঠক কৰাৰ পাছত সোমবাৰে উক্ত প্ৰতিনিধি দল আৰক্ষী অধীক্ষক বীৰ বিক্ৰম গগৈৰ সৈতে মিলিত হৈ বন্ধ সন্দৰ্ভত আলোচনা কৰে।

এপেক্স বডি কোঅৰ্ডিনেশ্যন কমিটিৰ সাধাৰণ সম্পাদক এছ চাঙছানে কয় যে সোমবাৰৰ পৰা হাইস্কুল শিক্ষান্ত পৰীক্ষা আৰম্ভ হৈছে। আনহাতে, অহা বৃহস্পতিবাৰৰ পৰা উচ্চ মাধ্যমিক পৰীক্ষা। এনে সময়তে অনিৰ্দিষ্টকালীন বন্ধই ছাত্ৰ সমাজক অধিক ক্ষতি কৰিব।

চাঙছানে লগতে কয়, ‘আইপিএফৰ নিজৰ দাবী আগত ৰাখি আন্দোলন গঢ়ি তোলাত আমাৰ আপত্তি নাই। কিন্তু পৰীক্ষাৰ পাছত হ’লে ছাত্ৰ সমাজ উপকৃত হ’ব। কিয়নো বিশেষকৈ হাফলঙত বহুত দূৰ দূৰনিৰ পৰা অভিভাৱক সকলে নিজৰ সন্তানক লৈ পৰীক্ষাৰ কাৰণে চহৰত উপস্থিত হয়। বন্ধ হ’লে সকলো ধৰনৰ যানবাহন বন্ধ থাকিব। তেতিয়া অহা যোৱা কৰাটো কঠিন হৈ পৰিব।‘

সাংবাদিকৰ এক প্ৰশ্নৰ উত্তৰত চাঙছানে কয় যে আইপিএফৰ আন্দোলনক সমৰ্থন কৰা সকল নিশ্চয় এই বন্ধৰ পক্ষত থাকিব। তাত কব লগা একো নাই।

নৱাগত আৰক্ষী অধীক্ষক বীৰ বিক্ৰম গগৈয়ে কয় যে আমি বন্ধ মোকাবিলা কৰাৰ কাৰনে সম্পূৰ্ণ ভাৱে সাজু হৈছো। আইন শৃংখলা ভংগকাৰী সকলৰ বিৰুদ্ধে ব্যৱস্থা লোৱা হ’ব। লগতে সামগ্ৰিক পৰিস্থিতি নিয়ন্ত্ৰণ ৰ কাৰনে অতিৰিক্ত নিৰাপত্তা অনা হৈছে বুলি আমাক জানিবলৈ দিয়ে।

ইপিনে বন্ধৰ সময়ছোৱাত পাৰ্বত্য স্বায়ত্ত শাসিত পৰিষদৰ অধীনস্থ চৰকাৰী বিভাগৰ কৰ্মচাৰী সকলক নিজ নিজ কাৰ্যালয়ত উপস্থিত থকাৰ বাবে নিৰ্দেশ দিয়া হৈছে।