আজি অৰুণাচল প্ৰদেশলৈ আহিব কেন্দ্ৰীয় গৃহ মন্ত্ৰী অমিত শ্বাহ

আজি অৰুণাচল প্ৰদেশলৈ আহিব দেশৰ গৃহ মন্ত্ৰী অমিত শ্বাহ। গৃহ মন্ত্ৰীগৰাকীয়ে অৰুণাচল প্ৰদেশৰ ৩৪ সংখ্যক ৰাজ্যিক দিৱসৰ কাৰ্যসূচীত মুখ্য অতিথি হিচাপে উপস্থিত থাকিব।

গৃহ মন্ত্ৰী শ্বাহে দিনৰ প্ৰায় ১১ মান বজাত অৰুণাচলত উপস্থিত হ’ব বুলি জানিব পৰা গৈছে।

গৃহ মন্ত্ৰ্যালয়ে টুইটযোগে এই কাৰ্যসূচীৰ এটা প্ৰম’ শ্বেয়াৰ কৰি লিখিছে, ‘বৃহস্পতিবাৰে অৰুণাচল প্ৰদেশৰ ইটানগৰত অনুষ্ঠিত হ’ব লগীয়া ৩৪ সংখ্যক ৰাজ্যিক দিৱসত কেন্দ্ৰীয় গৃহ মন্ত্ৰী অমিত শ্বাহ মুখ্য অতিথিৰূপে উপস্থিত থাকিব’।

জানিব পৰা মতে এই অনুষ্ঠানক উদ্দেশ্যি অৰুণাচল ভ্ৰমণলৈ আহিবলগীয়া শ্বাহে একেলগে অৰুণাচল প্ৰদেশ আৰক্ষীৰ মুখ্য কাৰ্যালয়ৰ আধাৰশিলা স্থাপনৰ লগতে আন কেইবাটাও কাৰ্যসূচীত অংশ ল’ব।

উল্লেখ্য যে ১৯৮৭ চনৰ ২০ ফেব্ৰুৱাৰিত অৰুণাচল প্ৰদেশক পূৰ্ণাংগ ৰাজ্য হিচাপে ঘোষণা কৰা হৈছিল। আৰু তাৰ পিছৰে পৰা আজিৰ দিনটো ৰাজ্যিক দিৱস হিচাপে পালন কৰি আহিছে।

১৯৭২ চনলৈকে ইয়াক নৰ্থ-ইষ্ট ফ্ৰণ্টিয়াৰ এজেন্সি (নেফা) বুলি জানিছিল। ১৯৭২ চনৰে ২০ জানুৱাৰিত কেন্দ্ৰীয় শাসিত ৰাজ্যৰ মৰ্যাদা প্ৰদান কৰি ইয়াৰ নাম অৰুণাচল প্ৰদেশ কৰা হয়।

ইটানগৰৰ আই জি পাৰ্কত অনুষ্ঠিত হ’বলগীয়া ৰাজ্যিক দিৱসৰ কাৰ্যসূচীৰ বাবে নিৰাপত্তা ব্যৱস্থা কটকটীয়া কৰি তোলা হৈছে।

ইফালে আজিৰ এই বিশেষ দিনটোৰ বাবে অৰুণাচল প্ৰদেশৰ চৰকাৰে সকলো ধৰণৰ প্ৰস্তুতি সম্পূৰ্ণ কৰি তোলা বুলি মুখ্য মন্ত্ৰী পেমা খাণ্ডুৱে জানিবলৈ দিয়ে।