অসম আৰক্ষীয়ে খাচী যুৱকক গ্ৰেপ্তাৰ কৰাক লৈ অসম-মেঘালয় সীমান্তত উত্তেজনা

অসম আৰক্ষীয়ে মেঘালয়ৰ পশ্চিম খাচী পাহাৰ জিলাৰ উমৱালি গাঁৱৰ দুগৰাকী জনজাতীয় খাচী যুৱকক অসমৰ বকোলৈ আহি থকাৰ সময়ত গ্ৰেপ্তাৰ কৰা ঘটনাক কেন্দ্ৰ কৰি অসম-মেঘালয় সীমান্তত উত্তেজনাই বিৰাজ কৰিছে।

উমৱালি গাঁৱৰ জনসাধাৰণে নৰ্থ-ইষ্ট নাওক জনোৱা মতে, শুকুৰবাৰে সন্ধিয়া অসম আৰক্ষীৰ এটা দলে নিৰপৰাধী খাচী যুৱক দুগৰাকীক বন্দুক দেখুৱাই গ্ৰেপ্তাৰ কৰে।

গ্ৰেপ্তাৰ হোৱা খাচী যুৱক দুগৰাকী ক্ৰমে অলনিংগাৰ ষ্টাইটাং আৰু বিবাৰুইছ মাৰৱেনি বুলি জানিব পৰা গৈছে।

আৰক্ষীয়ে যুৱক দুগৰাকীক বৰ্তমান ক’ত ৰাখিছে সেই সম্বন্ধেও গাঁৱবাসী অৱগত নহয় বুলি কয়।

যুৱক দুগৰাকীক গ্ৰেপ্তাৰ কৰা ঘটনাই উমৱালি আৰু ইয়াৰ পাৰ্শ্চৱৰ্তী অসম-মেঘালয় সীমান্তত উত্তেজনাৰ সৃষ্টি কৰিছে।

অসম আৰক্ষীয়ে মেঘালয়ৰ উমৱালিত প্ৰৱেশ কৰি গাঁৱৰ লোকৰ ব্যক্তিগত ভূমিত পহৰা চকী নিৰ্মাণ কৰিব বিচাৰিছিল বুলিও ইয়াৰ পূৰ্বে ১৯ ফেব্ৰুৱাৰিত উমৱালি গাঁৱৰ বাসিন্ধা সকলে অভিযোগ উত্থাপন কৰিছিল।

অসম আৰক্ষীৰ এই কাৰ্য্যৰ বিৰুদ্ধে উমৱালি গাঁৱৰ ৰাইজে তীব্ৰ প্ৰতিবাদ সাব্যস্ত কৰিছিল।

গাঁৱবাসীয়ে এইচ ওৱাই চি সদস্য সকলৰ সৈতে অসম আৰক্ষীয়ে পহৰা চকী নিৰ্মাণ কৰিব বিচৰা স্থানত গোটেই নিশা সমবেত হৈ থাকি প্ৰতিবাদ সাব্যস্ত কৰিছিল।

গাঁৱবাসীয়ে সাব্যস্ত কৰা এই প্ৰতিবাদৰ এটা ভিডিঅ’ ছ’চিয়েল মিডিয়াত ইতিমধ্যে ভাইৰেল হৈ পৰিছিল আৰু মেঘালয়ৰ জনসাধাৰণে অসম আৰক্ষীৰ এই ভূমিকাৰ বিৰুদ্ধে সৰৱ হৈ পৰিছিল।

ভিডিঅ’টোত অসম আৰক্ষীয়ে খাচী গাঁৱৰ লোকসকলক ভাবুকি দিয়া দেখা গৈছিল।

বিগত এটা বৰ্ষত এইটো উমৱালিত তৃতীয়টো এনেধৰণৰ ঘটনা।

বিগত বৰ্ষৰ ১৪ ফেব্ৰুৱাৰিত অসম আৰক্ষীয়ে উমৱালি গাঁৱৰ লোকৰ এটা দলৰ ওপৰত আক্ৰমণ কৰিছিল যি আক্ৰমণত বহুকেইগৰাকী লোক আঘাতপ্ৰাপ্ত হৈছিল।