গঁড় সংৰক্ষণ বিষয়ক তথ্যচিত্ৰৰ দৃশ্যগ্ৰহণৰ বাবে সপ্তাহজোৰা কাৰ্য্যসূচীৰে কাজিৰঙালৈ এইগৰাকী তাৰকা ক্ৰিকেটাৰ

গঁড় সংৰক্ষণ শীৰ্ষক বিষয়বস্তুৰ ওপৰত নিৰ্মাণ হ’বলগীয়া এখন তথ্যচিত্ৰৰ দৃশ্যগ্ৰহণৰ বাবে মাৰ্চৰ ৪ তাৰিখে সপ্তাহজোৰা ভ্ৰমণ সূচীৰে কাজিৰঙাত উপস্থিত হ’ব ইংলণ্ডৰ প্ৰাক্তন তাৰকা ক্ৰিকেটাৰ কেভিন পিটাৰছন।

গঁড় সংৰক্ষণক মুখ্য বিষয় হিচাপে লৈ নিৰ্মাণৰত তথ্যচিত্ৰখনৰ দৃশ্যগ্ৰহণ কাজিৰঙাৰ বিভিন্ন স্থানত কৰা হ’ব য’ত পেটাৰছনেও অংশ ল’ব।

৪ মাৰ্চৰ বিয়লি কাজিৰঙাত উপস্থিত হৈয়ে দৃশ্যগ্ৰহণৰ কামত ইংলেণ্ডৰ প্ৰাক্তন খেলুৱৈ গৰাকী ব্যস্ত হৈ পৰিব বুলি জানিব পৰা গৈছে।

বিশ্ব গঁড় সংৰক্ষণৰ সজাগতাৰ বাবে নিৰ্মাণ কৰা ‘চেভ দ্যা ৰাইনো’ নামৰ এই তথ্যচিত্ৰৰ প্ৰথম পৰ্যায়ৰ দৃশ্যগ্ৰহণ আফ্ৰিকাত সম্পূৰ্ণ কৰাৰ পাছত দ্বিতীয় পৰ্যায়ৰ দৃশ্যগ্ৰহণ কাজিৰঙাত সম্পন্ন কৰিব কেভিন পিটাৰছনে।

তথ্যচিত্ৰখনৰ দৃশ্যগ্ৰহণৰ বাবে ইতিমধ্যেই কাজিৰঙাৰ বিভিন্ন স্থান নিৰ্বাচন কৰি সাজু কৰি তোলা হৈছে৷ বন বিভাগ আৰু স্থানীয় প্ৰশাসনৰ সৈতে যোগাযোগ কৰি নিৰাপত্তা আৰু যাৱতীয় কাৰ্যও সম্পূৰ্ণ কৰা হৈছে বুলি জানিব পৰা গৈছে।

কাজিৰঙাৰ কাষৰীয় ধোবাআটি বেলগুৰি গাঁও, পানবাৰী গাঁও, ডিফলুপথাৰ উচ্চ মাধ্যমিক বিদ্যালয়, বনশিৱিৰ আৰু পানবাৰীত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ লগতে বিভিন্ন স্থানত কেভিন পিটাৰছনৰ তথ্যচিত্ৰৰ দৃশ্যগ্ৰহণ কৰা হ’ব।

প্ৰায়বোৰ দৃশ্যগ্ৰহণস্থলীতে হলিউডৰ অভিনেত্ৰী ৰাকুল প্ৰীতি কৌৰ আৰু কেভিন পিটাৰছন উপস্থিত থাকিব।

৪ মাৰ্চৰ পৰা ১১ মাৰ্চলৈ চলিব লগা এই দৃশ্যগ্ৰহণৰ পাচত ১২ মাৰ্চৰ ৰাতিপুৱা কাজিৰঙাৰ পৰা উভটিব কেভিন পিটাৰছনৰ দল।

কাজিৰঙাৰ পৰা উভতি যোৱাৰ প্ৰাকক্ষণত কাজিৰঙাত আয়োজিত কাজিৰঙা উৎসৱৰ উদ্বোধনী অনুষ্ঠানতো খেলুৱৈ গৰাকীয়ে অংশগ্ৰহণ কৰাৰ সম্ভাৱনা আছে।

কাজিৰঙাৰ দৃশ্যগ্ৰহণৰ সময়চোৱাতে অসমৰ বন মন্ত্ৰীৰো সাক্ষাৎকাৰ গ্ৰহণ কৰিব কেভিন পেটাৰছনে।

তথ্যচিত্ৰৰ জৰিয়তে খেলুৱৈ গৰাকীয়ে গঁড় সংৰক্ষণৰ বাবে কাজিৰঙাৰ সামগ্ৰিক প্ৰতিচ্ছবি বিশ্ববাসীৰ আগত দাঙি ধৰি গঁড় সংৰক্ষণৰ বাবে আহ্বান জনাব।