যোগী ৰাজ্যত হাতুৰী ডাক্তৰৰ উজান! দুই মুন্নাভাইৰ অস্ত্ৰোপচাৰত প্ৰাণ গ’ল ৫ বছৰীয়া শিশুৰ

সমগ্ৰ উত্তৰ প্ৰদেশত যেন এতিয়া ভুৱা চিকিৎসকৰ উজান উঠিছে। ভুৱা চিকিৎসকৰ চিকিৎসাৰ বলি হৈ মৃত্যক সাৱটি লৈছে এটি পাঁচ বছৰীয়া শিশুৱে। ইতিমধ্যে এই ঘটনাৰ লগত জড়িত দুই ভুৱা চিকিৎসকক গ্ৰেপ্তাৰ কৰা হৈছে।

জানিব পৰা মতে উত্তৰ প্ৰদেশৰ ছিৰিয়াৱা কলা গাঁৱত সংঘটিত হৈছে এই কৰুণ ঘটনা। যোৱা ১৬ মে’ত ৫ বছৰীয়া এটা শিশুক চিকিৎসাৰ বাবে চৰৱা মনুৰী পথৰ এখন ব্যক্তিগত চিকিৎসালয়ত ভৰ্তি কৰোৱা হৈছিল।

শিশুটিৰ পিতৃ ৰাম আছাৰৰ অভিযোগ অনুসৰি তাত শিশুটিৰ চিকিৎসাত চিকিৎসকে গাফিলতি কৰিছিল।

ৰাম আছাৰৰ অভিযোগৰ ভিত্তিত বিকাশ কুমাৰ (২৬) আৰু বিষেশ কুমাৰ (২৫) নামৰ দুজন ভাতৃক গ্ৰেপ্তাৰ কৰা হৈছে।

তদন্তৰ সময়তে আৰক্ষীয়ে জানিব পাৰে যে অভিযুক্ত ব্যক্তি দুজন কৌশাম্বী জিলাৰ বাসিন্দা। জেৰাৰ সময়ত দুয়োৱে কয় যে তেওঁলোকে আনমল নামৰ ব্যক্তিগত চিকিৎসালয়খন খুলিছে। তেওঁলোকৰ ভাতৃ সঞ্জয় কুমাৰৰ নামত পঞ্জীয়ন কৰা হৈছে চিকিৎসালয়খন। আৰক্ষীয়ে জনোৱা মতে, দুয়োজনে নিজকে চিকিৎসক বুলি দাবী কৰে। কিন্তু তেওঁলোকৰ কোনো মেডিকেল ডিগ্ৰী নাই। সেইদিনা শিশুটিৰ ভৰিৰ অস্ত্ৰোপচাৰ হোৱাৰ কথা আছিল। কিন্তু অস্ত্ৰোপচাৰ চিকিৎসকজন সময়মতে আহিব নোৱাৰিলে বাবে দুই অভিযুক্তই অস্ত্ৰপচাৰ কৰে। যাৰ ফলত শিশুটিৰ মৃত্যু হয়।

জানিব পৰা মতে, ইতিমধ্যে চিকিৎসালয়খন  ছীল কৰি দিছে আৰক্ষীয়ে।