ৰাংছালীত ব্ৰহ্মপুত্রত উদ্ধাৰ নথিপত্ৰ সম্বলিত বেগ; নিমাতী ঘাটৰ নাও দুৰ্ঘটনাৰ যাত্ৰীৰ হোৱাৰ সন্দেহ
বিহালীৰ ৰাংছালী অঞ্চলৰ ব্ৰহ্মপুত্ৰ নৈত উদ্ধাৰ হৈছে এজন ব্যক্তিৰ গুৰুত্বপূৰ্ণ নথি পত্ৰ সহ পৰিচয় পত্ৰ। এটা বেগত উদ্ধাৰ হৈছে এই নথি পত্ৰসমূহ।
বেগটোৰ ভিতৰত আছে লক্ষীমপুৰ জিলাৰ ঢকুৱাখানাৰ মদন পেগু নামৰ লোক এজনৰ AS 07R8009 নম্বৰৰ মাৰুতি গাড়ীৰ ৰেজিষ্ট্ৰেশ্যন কাৰ্ড, মদন পেগুৰ ভোটাৰ কাৰ্ড, পান কাৰ্ড।
ভোটাৰ কাৰ্ড,পান কাৰ্ডত মদন পেগুৰ ঠিকনা মাজুলি বুলি উল্লেখ আছে। বিভিন্ন বেংকৰ এটিএম কাৰ্ড, ক্ৰেডিট কাৰ্ড আৰু কেইখনমান নথি পত্ৰও পোৱা গৈছে।
আনহাতে, এই বেগটোতে আছে ছামেদ আলি নামত থকা AS06V2198 নম্বৰৰ এনফিল্ড বাইকৰ ৰেজিষ্ট্ৰেশ্যন কাৰ্ড এখনো।
উল্লেখ্য যে কালি আবেলি বিহালীৰ ৰাংছালী অঞ্চলৰ কেইজনমান মাছমৰীয়াই বেগটো প্ৰতক্ষ্য কৰি বেগটোৰ ভিতৰৰ পৰা এই সামগ্ৰীখিনি উদ্ধাৰ কৰে আৰু মাছমৰীয়া কেইজনে এই গুৰুত্বপূৰ্ণ সামগ্ৰী সমূহ নিজৰ জিম্মাতে ৰাখি আজি পুৱাহে সামগ্ৰী সমূহ বিহালী আৰক্ষী থানাত চমজাই দিব বুলি জানিব দিছে গাওঁখনৰ গাওঁৰক্ষী বাহিনীৰ সম্পাদক উদয় দাসে।
ইপিনে, এই সামগ্ৰীসমূহ মাজুলীৰ নিমাতী ঘাটত সংঘটিত হোৱা নাও দুৰ্ঘটনাৰ যাত্ৰীৰে সামগ্ৰী হ’ব বুলি সন্দেহ কৰা হৈছে।
পৰবৰ্তী সময়ত আৰক্ষীৰ অনুসন্ধানতহে ওলাব প্ৰকৃততে এই সামগ্ৰীসমূহ দুৰ্ঘটনা সংঘটিত হোৱা নাও যাত্ৰীৰ নে আন কাৰোবাৰ।