ডিমা হাছাও জিলাত এগৰাকী মহিলা চিকিৎসক ক’ভিড-১৯ত আক্রান্ত

ডিমা হাছাও জিলাৰ এগৰাকী চিকিৎসক এইবাৰ ক’ভিড আক্রান্ত। মঙলবাৰে অহা স্বাৱ ৰিপ’ৰ্ট অনুসৰি পার্বত্য জিলাৰ দিয়ুঙব্রা ব্লক প্রাথমিক স্বাস্থ্য কেন্দ্রৰ এগৰাকী মহিলা চিকিৎসকৰ শৰীৰত ক’ভিড পজিটিভ পোৱা গৈছে।

তথ্য অনুসৰি মহিলা চিকিৎসক গৰাকী ইয়াৰ আগতে দিয়ুঙব্রা বর্ডাৰ চেক গেটত কর্তব্যৰত আছিল। অৱশ্যে চিকিৎসক আক্রান্তৰ  ঘটনা পোহৰলৈ অহাৰ লগে লগে পাহাৰীয়া জিলাত নতুনকৈ ক’ভিড আতংক বিয়পি পৰিছে।

সাধাৰণ ৰাইজৰ প্রশ্ন হ’ল চিকিৎসক সকল যদি আক্রান্ত হয় তেনে ক্ষেত্ৰত চিকিৎসা ব্যবস্থাৰ কি হ’ব ?

এই পৰিস্থিতিত উত্তৰ কাছাৰ পার্বত্য স্বায়ত্ব শাসিত পৰিষদৰ স্বাস্থ্য বিভাগৰ ইএম চ্যামুয়াল চাংছানে কয় ক’ভিড আক্রান্ত মহিলা চিকিৎসকৰ সৈতে আমাৰ কথা-বতৰা হৈছে।

ইএম চাংছান আশাবাদী যে ক’ভিড আক্ৰান্ত চিকিৎসক অতি সোনকালে সুস্থ হৈ উভতি আহিব।

ইয়াৰ লগতে তেওঁ আন আন চিকিৎসক, নাৰ্ছৰ উপৰি ফ্রন্ট লাইন স্বাস্থ্য কর্মী সকলক আশ্বস্থ কৰি কয় যে ক’ভিড পজিটিভ আক্রান্ত চিকিৎসকক সুস্থ কৰি তুলিবলৈ স্বাস্থ্য বিভাগে যাৱতীয় ব্যবস্থা হাতত লৈছে।

উল্লেখনীয় যে ডিমা হাছাও জিলাত মুঠ ক’ভিড আক্রান্তৰ সংখ্যা ১৬৪। সুস্থ হৈ ঘৰলৈ উভতি গৈছে ১৪৯। চিকিৎসাধীন হৈ আছে ১৫ গৰাকী।

ইয়াৰ ভিতৰত হাফলং ক’ভিড কেয়াৰ চেন্টাৰত চিকিৎসাধীন ১১ গৰাকী। বাকি সকল জিলাৰ বাহিৰত চিকিৎসাধীন হৈ আছে।

আনহাতে চৰকাৰৰ স্বাস্থ্য বিভাগৰ নির্দেশ মর্মে ডিমা হাছাও জিলাৰ জিলা উপায়ুক্ত পল বৰুৱা আজি এক বিবৃতি যোগে জনাইছে যে এতিয়াৰ পৰা ৰাজ্যৰ বাহিৰৰ পৰা অহা ব্যক্তি সকলে চৈধ্য দিনৰ পৰিৱর্তে দহ দিন কোৱাৰেন্টাইন থাকিব লাগিব।

লগতে চিকিৎসালয়ৰ পৰা মুক্তি পোৱা পোৱা ক’ভিড আক্রান্ত সকলক সাত দিনৰ বাবে হ’ম কোৱাৰেন্টাইনত থকা বাধ্যতামূলক কৰিছে।