পিতৃ-মাতৃৰ কন্দলৰ পৰিণতিত প্ৰাণ গ’ল ১১ মহীয়া কণমানি পুত্ৰৰ

নগাঁও জিলাৰ চামগুৰি আৰক্ষী থানাৰ অন্তৰ্গত কুৰুৱাবাহী কছাৰী গাঁৱত নিশা সংঘটিত হয় এক চাঞ্চল্যকৰ কাণ্ড। কছাৰী গাঁৱৰ এহাল পিতৃ-মাতৃৰ কন্দলৰ পৰিণতিত প্ৰাণ গ’ল ১১মহীয়া অবোধ শিশু অংকুৰ দৈমাৰী ওৰফে নৱমৰ।

জানিব পৰা মতে সোমবাৰে নিশা কছাৰী গাঁৱৰ কনক দৈমাৰীয়ে পত্নী অপৰাজিতা দৈমাৰীৰ ওপৰত চলাইছিল অকথ্য নিৰ্যাতন। নিৰ্যাতন সহিব নোৱাৰি পত্নী অপৰাজিতাই পুত্ৰসহ জাপ দিছিল ঘৰৰ পিছফালৰ পুখুৰীত। লগে-লগে পত্নীক দ’ পুখুৰীটোৰ পৰা স্বামী কনকে উদ্ধাৰ কৰিবলৈ সক্ষম হয় যদিও কণমানি পুত্ৰৰ ঘটিল সলিল সমাধি।

ইফালে ঘটনাৰ বিষয়ে জানিব পাৰি স্থানীয় ৰাইজে শিশুটিৰ মৃতদেহটো পুখুৰীটোৰ পৰা উদ্ধাৰ কৰাৰ পিছত ঘটনাস্থলিত চামগুৰি আৰক্ষী উপস্থিত হৈ স্বামী কনক দৈমাৰীৰ লগতে পত্নী অপৰাজিতা দৈমাৰীক গ্ৰেপ্তাৰ কৰে।

কেৱল সুৰা আৰু জুৱাৰ বাবে স্বামী কনকে দীৰ্ঘদিন ধৰি পত্নী অপৰাজিতাক অমানুষিক নিৰ্যাতন চলাই আহিছিল বুলি স্থানীয় একাংশ লোকে গুৰুতৰ অভিযোগ উত্থাপন কৰিছে।

সম্প্ৰতি চামগুৰি আৰক্ষীয়ে ঘটনাটো সন্দৰ্ভত প্ৰাৰম্ভিক তদন্ত আৰম্ভ কৰাৰ লগতে ধৃত দম্পতিৰ ওপৰত জেৰা অব্যাহত ৰাখিছে।