ভোগালীৰ মূল্যৱান বাৰ্তা : বিশ্বনাথত নিঃস্বজনৰ বাবেও ভোগালীক অৰ্থপূৰ্ণ কৰাৰ প্ৰয়াস এটা পৰিয়ালৰ
আজিৰ দিনটো চাৰিওফালে ভোগৰ উৎসৱ যেন লগা বাবে ভোগালীতো শুদা ভাত এসাঁজৰ চিন্তা দূৰ নোহোৱা একাংশ মানুহো যে আছে সেই কথা বহুতেই পাহৰি যায়।
মাছ, মাংস, দৈ, গুৰ, চিৰা, ক্ৰীমৰ সংগ্ৰহত সকলো ব্যস্ত হৈ পৰাৰ মাজত হেৰাই যায় এওঁলোকৰ অন্ন-বস্ত্ৰহীন অৱস্থাৰ গুৰুত্ব।
কিন্তু তাৰ মাজতো দুই এজন আছে, যি এই দিনটোত দাৰিদ্ৰ্যপীড়িতজনৰ বাবেও ভোগালীক অৰ্থপূৰ্ণ কৰাৰ প্ৰয়াস কৰে।
বিশ্বনাথত দাৰিদ্ৰ্যপীড়িত একাংশ লোকক আজি ভোজ-ভাত খুৱাই মাঘবিহুৰ উৰুকা পালি বিশ্বনাথৰ প্ৰতিষ্ঠিত ব্যৱসায়ী তথা সমাজসেৱক অকণ শইকীয়া আৰু তেওঁৰ পৰিয়ালে সেই প্ৰয়াস কৰে।
জানিব পৰামতে, শইকীয়া আৰু তেওঁৰ পৰিয়ালটোৱে প্ৰতিবছৰেই ভোগালীত এই পদক্ষেপ লৈ আহিছে।
উদাহৰণৰ সৈতে দেখুওৱা এই ধৰণৰ সামাজিক দায়বদ্ধতাৰ মাজত সন্তুষ্টি লাভ কৰা জানিবলৈ দিছে অকণ শইকীয়াই।
আজি এনে কেইবাজনো লোকক মাতি আনি বিশ্বনাথ নগৰৰ মাজমজিয়াত অকন শইকীয়াৰ ব্যবসায়িক প্ৰতিষ্ঠান বিভান আৰু শইকীয়া জুয়েলাৰীৰ কাষতে এসাঁজ ভালকৈ খুওৱা দেখা যায়। খাবলৈ দিয়াৰ লগতে দৰিদ্ৰ লোকসকলক কাপোৰকানিও প্ৰদান কৰে পৰিয়ালটোৱে।