আই আই টি গুৱাহাটীত এইবাৰ বাঘৰ এনট্ৰেন্স; বনাঞ্চলিক বিষয়াৰ সহায় বিচাৰিলে কৰ্তৃপক্ষই
দেশৰ আগশাৰীৰ শিক্ষা প্ৰতিষ্ঠান আই আই টি গুৱাহাটীৰ চৌহদত মুক্তভাৱে বিচৰণ কৰি আছে এটা প্ৰকাণ্ড নাহৰফুটুকী বাঘ। আজি ৰাতিপুৱাৰ পৰাই বাঘটোৱে খাদ্য বিচাৰি উচ্চ শিক্ষাৰ প্ৰতিষ্ঠানখনত ঘূৰি ফুৰা বুলি জানিব পৰা গৈছে।
ইফালে প্ৰজ্ঞাৰ পোহৰ বিলোৱা প্ৰতিষ্ঠানত বাঘ ওলোৱাৰ খবৰ পাই লগে লগে উপস্থিত হয় বনকৰ্মীৰ এটা দল। বাঘটো কৰায়ত্ত কৰিবলৈ বন বিভাগৰ লোকে হাতে হাতে জাঠি-জোঙ লোৱাৰ উপৰি সংস্থাপন কৰিছে এটা প্ৰকাণ্ড পিঞ্জৰা। নাহৰফুটুকীটোক পিঞ্জৰাবদ্ধ কৰিবলৈ টোপ হিচাপে এটা ছাগলী ব্যৱহাৰ কৰিছে যদিও এই পৰ্যন্ত পিঞ্জৰাবদ্ধ হোৱা নাই বাঘটো।
উল্লেখ্য যে প্ৰকাণ্ড নাহৰফুটুকী বাঘটো প্ৰথমে এজন আই আই টিৰ সুৰক্ষা কৰ্মীয়ে দেখিছিল আৰু তাৰ পাছতে আই আই টি চৌহদত এক হাহকাৰ পৰিৱেশৰ সৃষ্টি হয়। খাদ্যৰ সন্ধানত আই আই টি চৌহদত প্ৰৱেশ কৰা বাঘটো বৰ্তমান ঘন জংঘলত আশ্ৰয় লৈ আছে বুলি বন কৰ্মীয়ে জানিবলৈ দিয়ে।
দীৰ্ঘদিনৰ পৰা সন্ত্ৰাসৰ সৃষ্টি কৰি অহা বাঘটোৱে ইতিমধ্যে এটা কেতেলা পহু ভক্ষণ কৰা বুলি জানিব পৰা গৈছে। এইদৰে আই আই টি গুৱাহাটীৰ সঞ্চালকৰ চৌহদতেই বাঘে কেতেলা পহু ভক্ষণ কৰাক লৈ উচ্চ শিক্ষাৰ প্ৰতিষ্ঠানখনত এক উৎকণ্ঠাময় পৰিৱেশৰ সৃষ্টি হৈছে।