ঘাঁহ কাটিবলৈ গৈ ভৰা লুইতৰ বুকুত সন্ধানহীন বুঢ়াচাপৰিৰ এজন লোক
নগাঁও জিলাৰ চামগুৰি সমষ্টিৰ সীমান্তবৰ্তী তথা শোণিতপুৰ জিলাৰ অন্তৰ্গত ব্ৰহ্মপুত্ৰৰ দক্ষিণ পাৰত অৱস্থিত বুঢ়াচাপৰিৰ ধনীয়াগাঁৱৰ এজন লোক সোমাবাৰৰ দুপৰীয়াৰ পৰা সন্ধানহীন হৈ আছে।
লোকজন ভৰা লুইতৰ বুকুত পৰি নোহোৱা হোৱা ঘটনাই সমগ্ৰ অঞ্চলটোত সম্প্ৰতি গভীৰ শোকৰ ছা পেলাইছে।
ঘটনা সন্দৰ্ভত জানিব পৰা মতে, বুঢ়াচাপৰিৰ ধনীয়া গাঁৱৰ নিবাসী শিৱ কুমাৰ কাৰ্কি নামৰ পঞ্চাশ উৰ্ধ্বৰ লোক জন সোমাবাৰে দুপৰীয়া লগৰ তিনিজনকৈ লোকৰ লগত এখন টুলুঙা নাৱৰে ভৰা ব্ৰহ্মপুত্ৰৰ মাজৰে বালিচৰত ঘাঁহ কাটিবলৈ যায়।
ঘাঁহ কাটিবলৈ যোৱা অৱস্থাতে ব্ৰহ্মপুত্ৰৰ কোৱাল সোঁতত পৰি নিয়ন্ত্ৰণহীন হৈ উটি যাব ধৰা নাওখন বচাবলৈ গৈ শোকাবহ দুৰ্ঘটনাটোত পতিত হয় বুলি জানিবলৈ দিয়ে স্থানীয় একাংশ লোকে৷
পৰৱৰ্তী সময়ত ঘটনাস্থলীত শোণিতপুৰ জিলা নদী আৰক্ষী আৰু এছ ডি আৰ এফ বাহিনীৰ এটা অভিযানকাৰী দল উপস্থিত হৈ লোকজনক উদ্ধাৰ কৰিবলৈ কেইবা ঘণ্টা ধৰি অভিযান অব্যাহত ৰাখে যদিও বৰ্তমানলৈকে নিখোজ লোক জনক উদ্ধাৰ কৰিবলৈ সক্ষম হোৱা নাই বুলি জানিব পৰা গৈছে।
ইফালে সন্ধিয়া আন্ধাৰ হৈ আহাৰ বাবে অভিযানকাৰীৰ দলটোৱে নিশাটোৰ বাবে ব্ৰহ্মপুত্ৰৰ বুকুত সন্ধানহীন লোকজনৰ উদ্ধাৰ অভিযান সাময়িকভাৱে স্থগিত ৰাখে যদিও মঙলবাৰে পুৱাৰে পৰা পুনৰ উদ্ধাৰ অভিযান আৰম্ভ কৰিব বুলি গাঁও খনৰ স্থানীয় লোকে জানিবলৈ দিছে।