হাবিৰ জুই

হৰেকৃষ্ণ  ডেকা

হাবিখনত কেনেকৈ জুই লাগিছিল

কোনেও ক’ব নোৱাৰে ৷

আপুনি পালি-পহৰীয়া ৰাখিছিল

কিন্তু তেওঁলোক গছ কটাত ব্যস্ত আছিল ৷

এচুকত লগা জুই বাঢ়ি গৈছিল আৰু

গোটেইখন হাবি আগুৰি ধৰিছিল ৷

আপুনি আন একুৰা জুইৰ সৈতে

ধেমালি কৰি আছিল।

এইকুৰা জুইৰ ধোঁৱা আহি আপোনাৰ নাকত সোমাওঁতেহে

আপুনি সচকিত হৈছিল ৷

আপুনি ধেমালি কৰা জুইকুৰাকেতকৈ

এই জুইকুৰা দেখোন বেলেগ!

আপুনি যুদ্ধ-যাত্রাৰ ব্যস্ততাৰে লৰা-ধপৰা

লগাইছিল ৷

আঃ, আপোনাৰ এই তৎপৰতা ইমান প্রশংসনীয় !

জুই নুমুওৱা সা-সৰঞ্জামবোৰত

মামৰ লাগিছিল আৰু প্রস্তুত হওঁতে

সময় লাগিছিল ৷

কিন্তু এই সমৰ-যাত্রা আছিল সশব্দ,

আৰু ঢাক-বাদ্যৰেও ঘোষণা কৰা হৈছিল ৷

জুই ইতিমধ্যে নিজেই নুমাইছিল,

কাৰণ পুৰিবলৈ আৰু একো নাছিল ৷

বহুদিনৰ মূৰত এখন প্রতিবেদন তৈয়াৰ হৈছিল।

কিন্তু এতিয়ালৈকে কোনেও পঢ়িবলৈ আহৰি পোৱা নাই ৷

নকলেও হ’ব, তাত আপোনাৰ তৎপৰতাক প্রশংসা কৰাই হৈছিল ৷