লকডাউনৰ সময়ত দৰিদ্ৰ পৰিয়ালক অত্যাৱশ্যকীয় সামগ্ৰী প্ৰদান এগৰাকী আৰক্ষী বিষয়াৰ

বিশ্বজুৰি তোলপাৰ লগোৱা মাৰাত্মক ক’ৰ’না ভাইৰাছৰ পৰা পৰিত্ৰাণ পাবলৈ দেশৰ প্ৰধান মন্ত্ৰী নৰেন্দ্ৰ মোদীয়ে আহ্বান জনোৱা ২১ দিনিয়া লকডাউনৰ ফলত হাহাকাৰ সৃষ্টি হৈছে ভিতৰুৱা গাঁও অঞ্চলৰ বহু দৰিদ্ৰ পৰিয়ালৰ মাজত।

চৰকাৰে এপ্ৰিল মাহৰ প্ৰথম সপ্তাহৰ পৰা দুখীয়া সকলৰ মাজত বিনামূলীয়া চাউল বিতৰণ কৰিছে যদিও সেয়া যে পৰ্যাপ্ত নহয় সেইটো পৰিলক্ষিত হৈছে।

খাটি খোৱা লোকৰ মাজত দেখা দিয়া এই সংকটত সকাহ দিবলৈ এগৰাকী আৰক্ষী বিষয়া আগবাঢ়ি অহা কাৰ্যই সকলোৰে দৃষ্টি কাঢ়িছে।

কোকৰাঝাৰ জিলাৰ অন্তৰ্গত কাৰিগাঁও আৰক্ষী চকীৰ আৰক্ষী বিষয়া অংগৰাজ চেত্ৰীয়ে তিনিদিন ধৰি মানৱতাৰে দৰিদ্ৰ পৰিয়ালক বিতৰণ কৰি আছে চাউল, দাইল, আলু, মিঠা তেল, চাবোন আদিকে ধৰি অত্যাৱশ্যকীয় সামগ্ৰী।

নিজৰ চাকৰিৰ ধন আৰু সহযোগীসকলৰ পৰা ধন সংগ্ৰহ কৰি দৰিদ্ৰ পৰিয়াল সকলৰ মাজত খাদ্য সামগ্ৰী বিতৰণ কৰাৰ লগতে ক’ৰ’না ভাইৰাছৰ ওপৰত কবিতা ৰচনা কৰি আবৃত্তিও কৰিলে আৰক্ষী বিষয়াজনে।

ইতিমধ্যে কাৰিগাঁও আৰক্ষী চকীৰ অন্তৰ্গত বিভিন্ন গাঁও সমূহত সোমাই ৩৫০ টাতকৈও অধিক পৰিয়ালৰ ঘৰে ঘৰে গৈ অত্যাৱশ্যকীয় সামগ্ৰী বিতৰণ কৰা বুলি জনাইছে বিষয়াজনে।