“ডাৰ্লিং, তোমাৰ বাবে প্ৰশ্নকাকত যোগাৰ কৰিছোঁ”: ছাত্ৰীক অশ্লীল প্ৰস্তাৱ দি গ্ৰেপ্তাৰ অধ্যাপক

লক্ষ্ণৌ বিশ্ববিদ্যালয়ৰ এজন অধ্যাপকক এগৰাকী ছাত্ৰীৰ সৈতে ফোনযোগে অশ্লীল কথা-বতৰা পতা আৰু পৰীক্ষাৰ প্ৰশ্নকাকত ফাদিল কৰাৰ প্ৰলোভনেৰে আকৰ্ষণ কৰিবলৈ চেষ্টা কৰাৰ অভিযোগত গ্ৰেপ্তাৰ কৰা হৈছে।

অভিযুক্ত অধ্যাপকজনৰ নাম পৰমজীত সিং। তেওঁ বিশ্ববিদ্যালয়খনৰ প্ৰাণীবিজ্ঞান বিভাগৰ সহকাৰী অধ্যাপক। ছ’চিয়েল মিডিয়াত তেওঁৰ এটা অডিঅ’ ৰেকৰ্ডিং ভাইৰেল হোৱাৰ পিছতে আৰক্ষীয়ে তেওঁক জিম্মাত লয়। ভাইৰেল হোৱা ক্লিপটোত তেওঁ এগৰাকী বি এছ চি চূড়ান্ত বৰ্ষৰ ছাত্ৰীৰ পৰা যৌন অনুগ্ৰহ বিচৰা শুনা গৈছে। তেওঁ ছাত্ৰীগৰাকীক কৈছিল যে, “ডাৰ্লিং, মই তোমাৰ বাবে পৰীক্ষাৰ প্ৰশ্নকাকত যোগাৰ কৰিছোঁ, পৰীক্ষাৰ আগতে আহা আৰু মই সেইখিনি তোমাক দিম।”

এই ঘটনাৰ পিছত ছাত্ৰীগৰাকী মানসিকভাৱে ভাঙি পৰে আৰু সমগ্ৰ বিষয়টো বিশ্ববিদ্যালয় প্ৰশাসনক অৱগত কৰে। ইয়াৰ পিছতে পৰীক্ষা নিয়ন্ত্ৰক বিদ্যানন্দ ত্ৰিপাঠীয়ে আৰক্ষীৰ ওচৰত এখন আনুষ্ঠানিক এজাহাৰ দাখিল কৰে। হাছানগঞ্জ আৰক্ষী থানাত এটা গোচৰ ৰুজু কৰা হৈছে আৰু বৰ্তমান অভিযুক্ত অধ্যাপকজনক জেৰা কৰি থকা হৈছে।

অৱশ্যে, অভিযুক্ত সিং নামৰ অধ্যাপকজনে এই সকলো অভিযোগ অস্বীকাৰ কৰিছে। তেওঁ দাবী কৰিছে যে বিশ্ববিদ্যালয়ৰ আভ্যন্তৰীণ ৰাজনীতিৰ বাবে তেওঁক ইচ্ছাকৃতভাৱে ফঁচোৱা হৈছে। ইফালে, উপাচাৰ্য জে পি চাইনীয়ে আভ্যন্তৰীণ অভিযোগ সমিতিক সমগ্ৰ বিষয়টোৰ তদন্ত কৰি ২৪ ঘণ্টাৰ ভিতৰত প্ৰতিবেদন দাখিল কৰিবলৈ নিৰ্দেশ দিছে। বিশ্ববিদ্যালয় প্ৰশাসনে জনাইছে যে শিক্ষানুষ্ঠানখনৰ মৰ্যাদা আৰু শৈক্ষিক পৰিৱেশ বিনষ্ট কৰা কোনো কাৰ্য সহ্য কৰা নহ‘ব আৰু এনে ক্ষেত্ৰত বিশ্ববিদ্যালয়ে কঠোৰ নীতি মানি চলে।

এই অডিঅ’ ক্লিপটো পোহৰলৈ অহাৰ পিছতে অখিল ভাৰতীয় বিদ্যাৰ্থী পৰিষদ, চমুকৈ এবিভিপিৰ কৰ্মীসকলে বিশ্ববিদ্যালয় চৌহদত প্ৰতিবাদ সাব্যস্ত কৰে আৰু অভিযুক্ত অধ্যাপকজনক লগে লগে নিলম্বন কৰাৰ দাবী জনায়। এবিভিপিৰ লক্ষ্ণৌ বিশ্ববিদ্যালয় গোটৰ সভাপতি জয় শ্ৰীবাস্তৱে কয় যে এখন সন্মানীয় শিক্ষানুষ্ঠানত এনে সস্তীয়া আৰু বিকৃত মানসিকতাৰ কোনো স্থান নাই। তেওঁ লগতে কয় যে যৌন নিৰ্যাতন আৰু পৰীক্ষা প্ৰক্ৰিয়াৰ স্বচ্ছতা নষ্ট কৰাৰ অভিযোগত অভিযুক্ত অধ্যাপকজনক কাৰাগাৰলৈ প্ৰেৰণ কৰিব লাগে।