নিট পৰীক্ষাৰ প্ৰশ্নকাকত ফাদিল: মাষ্টাৰমাইণ্ড পুনেৰ জীৱবিজ্ঞানৰ শিক্ষয়িত্ৰীক গ্ৰেপ্তাৰ কৰিলে চি বি আয়ে

৩ মে‘ত অনুষ্ঠিত হোৱা ২০২৬ বৰ্ষৰ নিট (NEET-UG) প্ৰৱেশ পৰীক্ষাৰ প্ৰশ্নকাকত ফাদিল হোৱা ঘটনাত চি বি আয়ে শনিবাৰে এগৰাকী জীৱবিজ্ঞানৰ শিক্ষয়িত্ৰীক গ্ৰেপ্তাৰ কৰিছে। মনীষা মান্ধাৰে নামৰ উদ্ভিদবিজ্ঞানৰ এই অধ্যাপিকা গৰাকী নেচনেল টেষ্টিং এজেন্সীৰ (NTA) প্ৰশ্নকাকত প্ৰস্তুত কৰা সমিতিৰো অংশ আছিল। চি বি আইৰ মতে, তেওঁ এই সমগ্ৰ ঘটনাটোৰ এগৰাকী অন্যতম মাষ্টাৰমাইণ্ড আৰু তেওঁৰ পৰাই জীৱবিজ্ঞানৰ প্ৰশ্নসমূহ ফাদিল হৈছিল।

এই ঘটনাৰ মূল অভিযুক্ত তথা অৱসৰপ্ৰাপ্ত ৰসায়ন বিজ্ঞানৰ অধ্যাপক পি ভি কুলকাৰ্ণী আৰু আন কেইজনমান লোকক জেৰা কৰাৰ পিছতেই মনীষাক গ্ৰেপ্তাৰ কৰা হয়। মনীষা মান্ধাৰে পুনেৰ মডাৰ্ণ কলেজ অৱ আৰ্টছ, চাইন্স এণ্ড কমাৰ্চত কৰ্মৰত। মহাবিদ্যালয়খনৰ সূত্ৰৰ মতে, তেওঁ যোৱা পাঁচ-ছয় বছৰ ধৰি এন টি এৰ হৈ নিট পৰীক্ষাৰ প্ৰশ্নকাকত প্ৰস্তুত কৰাৰ কাম কৰি আহিছে। এইবাৰৰ পৰীক্ষাৰ বাবেও তেওঁক উদ্ভিদবিজ্ঞান আৰু প্ৰাণীবিজ্ঞানৰ প্ৰশ্ন প্ৰস্তুত কৰিবলৈ বিশেষজ্ঞ হিচাপে নিযুক্তি দিয়া হৈছিল।

বিষয়া সকলে জানিবলৈ দিয়া মতে, তেওঁৰ হাতত উদ্ভিদবিজ্ঞান আৰু প্ৰাণীবিজ্ঞানৰ সম্পূৰ্ণ প্ৰশ্নকাকত উপলব্ধ আছিল। অভিযোগ অনুসৰি, তেওঁ ২০২৬ চনৰ এপ্ৰিল মাহত পুনেত অনুষ্ঠিত গোপন কোচিং ক্লাছৰ সময়ত একাংশ নিৰ্বাচিত ছাত্ৰ-ছাত্ৰীক এই প্ৰশ্নসমূহ ফাদিল কৰিছিল। কেন্দ্ৰীয় তদন্তকাৰী সংস্থাটোৱে দাবী কৰিছে যে মনীষাই লাখ লাখ টকাৰ বিনিময়ত এই প্ৰশ্ন আৰু ইয়াৰ উত্তৰসমূহ ছাত্ৰ-ছাত্ৰীসকলক লিখাই দিছিল। তেওঁ দিয়া বেছিভাগ প্ৰশ্নই ৩ মে‘ৰ পৰীক্ষাত অহা প্ৰশ্নৰ সৈতে মিলি গৈছিল। প্ৰশ্নকাকত ফাদিলৰ এই ডাঙৰ অভিযোগৰ পিছতেই নিট পৰীক্ষা বাতিল কৰা হৈছিল।