২৮ বছৰে বিনা বেতনে শিক্ষকতা; শিক্ষক ব্ৰজেন গগৈয়ে শিক্ষক দিৱসৰ দিনটোত কি কৰিছে চাওক

আজি শিক্ষক দিৱস। এই বিশেষ দিনটোত সমগ্ৰ দেশতে উদযাপন কৰা হৈছে শিক্ষক দিৱস l

কিন্তু শিক্ষকসকলৰ মাজৰে একাংশ শিক্ষক এই বিশেষ দিনটোত পেটৰ তাড়নাত, পৰিয়াল পোহপাল দিয়াৰ তাগিদাত ব্যস্ত থাকিব লগা হৈছে হাঁহ-কুকুৰা, গৰুৰ সৈতে, বাৰীৰ পাণ, নেমুটেঙা, কল বজাৰলৈ নি দুপইচা উপাৰ্জনৰ কামত।

কাৰণ চৰকাৰী মেৰপেচৰ বাবে আজিও বঞ্চিত হৈ আছে চৰকাৰী দৰমহা, স্বীকৃতিৰ পৰা বহু শিক্ষক -শিক্ষয়িত্ৰী।

ওৰেটো জীৱন মানব সম্পদ গঢ়াত ব্ৰতী যোৰহাট জিলাৰ টীয়কৰ বলমাজান মধ্য ইংৰাজী বিদ্যালয়ৰ প্ৰধান শিক্ষক ব্ৰজেন গগৈয়ে যোৱা ২৮ বছৰে নাপালে চৰকাৰী বেতন।

১৯৯২ চনত স্থাপন হোৱা বিদ্যালয়খন আজিও প্ৰাদেশিকীকৰণ নহ’ল।

অঞ্চলটোত শিক্ষাৰ পৰিবেশ অক্ষুন্ন ৰাখিবলৈ গগৈয়ে বিনা বেতনে শিক্ষকতাৰ সমান্তৰালকৈ ঘৰতে হাঁহ, কুকুৰা, গো পালন কৰাৰ লগতে নেমুটেঙা, পান,কল আদি খেতি কৰি সেই সমূহ বজাৰত বিক্ৰী কৰি পোৱা টকাৰে পৰিয়ালৰ অভাৱ পূৰণ কৰি আহিছে।

তদুপৰি, তেওঁৰ পত্নীয়ে কাপোৰ চিলাই উপাৰ্জন কৰে কিছু টকা।

যি সময়ত ইখনৰ পাছত সিখন চৰকাৰী বিদ্যালয় ছাত্ৰ-ছাত্ৰীৰ অভাৱত বন্ধ হৈ পৰিছে তেনে সময়ত বলমাৰ দৰে ভিতৰুৱা এক অঞ্চলত শিক্ষাৰ পোহৰ বিলাইছে ব্ৰজেন গগৈৰ দৰে শিক্ষকে।

বলমাজান মধ্য ইংৰাজী বিদ্যালয়ত ৬৩ গৰাকীকৈ ছাত্র-ছাত্ৰী অধ্যয়ন কৰা বিদ্যালয়খনৰ প্ৰতি, শিক্ষক সকলৰ প্ৰতি চৰকাৰখনে দীৰ্ঘদিন বঞ্চনা কৰি অহাৰ পাছত সেয়ে শিক্ষক দিৱসৰ বিশেষ দিনটোৱে আকৰ্ষণ নকৰে এইসকল শিক্ষা গুৰুক।

এইসকল শিক্ষক তথা প্ৰাদেশিকীকৰণ নোহোৱা বিদ্যালয়ৰ ওপৰত কেতিয়া চৰকাৰৰ দৃষ্টি পৰিব?