বোকাখাতত নিজকে ‘আনলা’ৰ সেনাধ্যক্ষ বুলি দাবী কৰা যুৱকক গ্ৰেণেডসহ আটক সেনাৰ

কাজিৰঙাৰ বাগৰিস্থিত সেনা চাউনিৰ অভিযানকাৰী দলে ২ ফেব্ৰুৱাৰি অৰ্থাৎ শনিবাৰৰ নিশা বোকাখাতৰ ৰাজ্যিক পৰিবহন নিগমৰ বাছ আস্থানত মেৰাপানীৰ পৰা গুৱাহাটীলৈ বুলি আহি থকা এখন নৈশ বাছৰ পৰা নিৰ্মাল তিৰ্কী ওৰফে ডেভিড তিৰ্কী নামৰ এজন যুৱকক আটক কৰে।

ধৃত যুৱকজন মেৰাপানীৰ ১ নং নাহৰতলিৰ নিবাসী বুলি জানিব পৰাৰ লগতে অভিযানকাৰী দলটোৰ আগত যুৱকজনে  নিজকে ‘আনলা’ নামৰ সংগঠনটোৰ সেনাধ্যক্ষ তথা যুদ্ধ বিৰতি গোটৰ বুলি চিনাকি দিয়ে।

ধৃত যুৱকজনৰ বেগৰ পৰা সেনাই দুটা হেণ্ড গ্ৰেনেড, এটা পিষ্টল, দুটা সক্ৰিয় গুলী, এটা মেগজিন, গ্ৰেনেডৰ ফিউজ, কিছু পৰিমাণৰ নগদ ধন আৰু কেতবোৰ আপত্তিজনক নথিপত্ৰ জব্দ কৰে৷

যুৱকজনে জানিবলৈ দিয়া মতে তেওঁ আলোচনাৰ বাবে গুৱাহাটীলৈ আহি থাকোতেই বোকাখাতত তেওঁক সেনাই আটক কৰিছে। ইফালে আজি সেনা বাহিনীয়ে ধৃত যুৱকজনক বোকাখাত আৰক্ষীক গতাই দিয়ে।