দেৱভাষাক মৃতসঞ্জীৱনী! এইখন অসমতে আছে এতিয়াও সংস্কৃত ভাষাত কথা কোৱা এখন গাওঁ

সংস্কৃত হৈছে গ্ৰন্থৰ ভাষা, পণ্ডিতসকলৰ ভাষা। বাস্তৱত এই ভাষাটো মৃত বুলি ক’ব পাৰি। কিন্তু ইয়াৰ ব্যতিক্ৰম হৈছে অসমৰ এখন সৰু গাওঁ। দৈনন্দিন জীৱনত অপ্ৰচলিত এই  ভাষাই প্ৰচলিত ৰূপ লৈছে ইয়াত।

অসমৰ কৰিমগঞ্জৰ পাটিয়ালা গাঁৱৰ বাসিন্দাসকলে ২০১৫ চনৰ পৰাই সংস্কৃত অনুশীলন কৰি আহিছে। বৰ্তমান গাওঁখনৰ ৬০ টা পৰিয়ালৰ সকলোৱে সংস্কৃত ভাষাত কথা কয়।

গাঁওখনৰ শিশুসকলেও এই কঠিন ভাষাটো আয়ত্ত কৰিয়েই ডাঙৰ-দীঘল হৈছে।

লগতে পঢ়ক: গুগলক ১,৩৩৭ কোটি টকাৰ জৰিমনা কেন্দ্ৰৰ; ওলোটাই ‘সতৰ্ক’ কৰি দিলে চাৰ্চ ইঞ্জিন সংস্থাটোৱে

এই ৬০ টা পৰিয়ালৰ ৩০০ জন লোকে সংস্কৃত ক’বলৈ পাই বৰ আনন্দিত। এই গাওঁখনৰ বাসিন্দাসকলে নিশ্চিত কৰিবলৈ চেষ্টা কৰি আছে যে তেওঁলোকৰ পৰৱৰ্তী প্ৰজন্মইও সংস্কৃত ভাষা কওক আৰু তাৰ বাবে তেওঁলোকে উৎসাহো দিছে।

গাঁওখনৰ এগৰাকী বাসিন্দা দ্বিপনাথে কয়, “২০১৫ চনৰ কথা যেতিয়া আমাৰ গাঁৱত সংস্কৃত শিবিৰ স্থাপন কৰা হৈছিল তেতিয়াৰ পৰা আমি সংস্কৃতত কথা পাতিবলৈ শিকিছোঁ, এতিয়া সকলোৱে এই ভাষা কয়। আমাৰ ইয়াত ৬০ টা পৰিয়াল আছে। তেওঁলোকৰ সন্তানকে ধৰি সকলোৱে এতিয়া যোগাযোগৰ ক্ষেত্ৰত এই প্ৰাচীন ভাষা ব্যৱহাৰ কৰি আছে।‘’