এন আৰ চি এফেক্ট !! আপছুৱে সন্দেহজনক প্ৰায় তিনিশ লোকক আটক কৰি এৰি দিলে অসমত
অৰুণাচল প্ৰদেশত অবৈধভাৱে প্ৰৱেশ কৰা সন্দেহজনক লোকসকলক সদৌ অৰুণাচল প্ৰদেশ ছাত্ৰ সন্থাই অৰুণাচল ত্যাগ কৰাৰ বাবে নিৰ্ধাৰণ কৰি দিয়া সময়সীমা উকলি যোৱাৰ পিছত শুকুৰবাৰে আপছুৰ অপাৰেশ্যন ক্লীন ড্ৰাইভ আৰম্ভ হৈছে।
ইয়াৰ লগে লগে অৰুণাচল প্ৰদেশত কৰ্মসূত্ৰে বসবাস কৰা অনা-অৰুণাচলী লোকসকল আতংকিত হৈ পৰিছে। অৱশ্যে যিসকলৰ অৰুণাচলত প্ৰৱেশৰ আন্তঃৰাজ্যিক পাৰ-পত্ৰ আছে সেইসকলৰ কোনো চিন্তাৰ কাৰণ নাই বুলি আপছুৱে ঘোষণা কৰিছে।
শুকুৰবাৰে আপছুৱে অৰুণাচল প্ৰদেশৰ ৰাজধানী ইটানগৰ, নাহৰলগুণ, নিৰজুলি, দুইমুখ, কাৰ্চিংচা আদি স্থানত সন্দেহজনক নাগৰিকসকলৰ ঘৰে ঘৰে গৈ তথ্য-পাতি নিৰীক্ষণ কৰি তালাচী চলায়। আপছুৱে উক্ত অঞ্চলসমূহত তালাচী চলাই প্ৰায় তিনিশ সন্দেহজনক লোকক আটক কৰি আৰক্ষীক গতাই দিয়ে।
আনহাতে, অৰুণাচল আৰক্ষীয়ে এই লোকসকলক অসম-অৰুণাচল সীমাৰ লখিমপুৰ জিলাৰ বান্দৰদেৱাৰ অৰুণাচলৰ আৰক্ষী তালাচী চকীৰে অসমৰ লখিমপুৰ জিলাত মুকলি কৰি দিয়ে।
জানিব পৰা মতে এই লোকসকলৰ বেছিভাগেই বিহাৰ, ঝাৰখণ্ড, উত্তৰ প্ৰদেশ, কোচবিহাৰ আদিৰ লোক। ইপিনে অসমৰ লোকো আপছুৰ অপাৰেশ্যন ক্লীন ড্ৰাইভৰ বুলি হ’বলগীয়া হৈছে বুলি অভিযোগ উত্থাপিত হৈছে।
লক্ষ্যণীয়ভাৱে আপছুৰ এই অপাৰেশ্যন ক্লীন ড্ৰাইভত অৰুণাচল আৰক্ষী প্ৰশাসনে পূৰ্ণ সহযোগিতা আগবঢ়োৱাৰ কথা আছিল। কিন্তু ইয়াৰ বিপৰীতে শুকুৰবাৰে একপক্ষীয়ভাৱে ছাত্ৰ সংগঠনটোৱে এই তালাচী অভিযান চলায়।
উল্লেখ্য যে, অসমত এই সন্দেহজনক লোকসকলক মুকলি কৰি দিয়াৰ ক্ষেত্ৰটো লখিমপুৰ জিলা প্ৰশাসন অথবা জাতীয় সংগঠনসমূহ নীৰৱে থকাটো লক্ষণীয় হৈ পৰিছে।