তেজপুৰত আছুৰ সদস্যক বিচাৰি আৰক্ষীৰ হাৰাশাস্তি; নিশা ঘৰত গৈ ভাবুকি অচিনাক্ত দুৰ্বৃত্তৰ

তেজপুৰত এফালে আৰক্ষীয়ে সদৌ অসম ছাত্ৰ সন্থাৰ সদস্যক হাৰাশাস্তি কৰিছে আনফালে বিজেপিৰ ভেৰোণীয়া গুণ্ডাবাহিনীয়ে নিশা সদৌ অসম ছাত্ৰ সন্থাৰ সদ্যসৰ ঘৰতৈ গৈ ভাবুকি প্ৰদান কৰিছে।

এই অভিযোগ উত্থাপন কৰিছে সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক নিতুল বৰাই। লগতে জিলা আৰু আঞ্চলিক সমিতিৰ সদস্যসকলেও এই অভিযোগ উত্থাপন কৰিছে।

বৃহস্পতিবাৰে অৰ্থাৎ ২৬ ডিচেম্বৰৰ নিশা তেজপুৰ আঞ্চলিক ছাত্ৰ সন্থাৰ সভাপতি অৰূপ তালুকদাৰৰ বাসগৃহত গৈ কোনো অচিনাক্ত দুৰ্বৃত্তই ভাবুকি প্ৰদান কৰে। এই কাৰ্যত সদৌ অসম ছাত্ৰ সন্থা জাঙুৰ খাই উঠাৰ লগতে এই কাৰ্যক তীব্ৰ গৰিহণা দিছে।

আনহাতে, তেজপুৰ আৰক্ষীয়েও আছুৰ সদস্যক বিচাৰি ঘৰে ঘৰে অভিযান চলোৱাৰ লগতে হাৰাশাস্তি চলাইছে। এই ঘটনা সন্দৰ্ভত আছুৰ এটা দলে আজি তেজপুৰ সদৰ থানাত উপস্থিত হয়।

আছুৱে আৰক্ষীক ভাবুকি প্ৰদান কৰা অচিনাক্ত দুৰ্বৃত্তক আটক কৰিবলৈ আহ্বান জনোৱাৰ লগতে আছুৰ কোনো সদস্যক বিনা কাৰণত হাৰাশাস্তি নকৰিবলৈ আৰক্ষীক আহ্বান জনায়।

ইফালে আছুৱে স্পষ্ট কৰি কয় যে ৰাজ্যজুৰি আছুৱে সম্পূৰ্ণ গণতান্ত্ৰিক আন্দোলন চলাই আছে আৰু এই আন্দোলনক চৰকাৰে দমন নীতিৰে বন্ধ কৰিব নোৱাৰিব। দলটোৱে ঘটনা সংক্ৰান্তত তেজপুৰৰ সাংসদ পল্লৱলোচন দাসকো সতৰ্ক কৰি দিয়ে।