হাজোৰ সনাতন ডেকাৰ হত্যাকাণ্ড: ড০সমুজ্জ্বল কুমাৰ ভট্টাচাৰ্য আৰু লুৰিনজ্যোতি গগৈৰ প্ৰতিক্ৰিয়া

হাজোৰ মনাহকুচিৰ সনাতন ডেকাৰ নৃশংস হত্যাক কেন্দ্ৰ কৰি প্ৰতিক্ৰিয়া প্ৰকাশ কৰিছে আছুৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য আৰু সাধাৰণ সম্পাদক লুৰিণজ্যোতি গগৈয়ে।

লুৰিনে এই ঘটনাৰ তীব্ৰ ভাষাৰে গৰিহণা দিয়াৰ লগতে চৰকাৰৰ গৃহ বিভাগ তথা আৰক্ষী প্ৰশাসনক কঠোৰ ভাষাৰে সমালোচনা কৰিছে।

এক ফেচবুক পোষ্টযোগে গগৈয়ে লিখি কয়, “দিনৰ পোহৰতে এটা দুৰ্ঘটনাৰ আলম লৈ এনেকৈ মৰিয়াই মানুহ মৰাৰ সাহস পোৱা কাৰ্য সভ্য সমাজৰ বাবে ভয়ংকৰ| প্ৰশাসন, আইনলৈ ন্যূনতমো ভয়,সন্মান নথকা পৰিৱেশ এটা অসমত গঢ় ল’বলৈ পাইছে। চৰকাৰৰ গৃহ বিভাগ,আইন বলৱৎকাৰী সংস্থাসমূহ চূড়ান্তভাৱে ব্যৰ্থ হৈছে।”

ইপিনে সনাতন ডেকা নামৰ শাক পাচলি ব্যৱসায়ীজনক পাঁচ দুৰ্বৃত্তই প্ৰহাৰ কৰি হত্যা কৰা ঘটনাটোক উদ্বেগজনক আখ্যা দিছে আছুৰ সাধাৰণ সম্পাদকগৰাকীয়ে।

“যোৱা ২২মে’, ২০২০ত হাজোৰ মনাহকুচি গাঁৱত সনাতন ডেকা নামৰ পাচলি ব্যৱসায়ীগৰাকীৰ হত্যা অত্যন্ত উদ্বেগজনক খবৰ।”

তদুপৰি, সনাতনৰ পাঁচ হত্যাকাৰীৰ কঠোৰ শাস্তিৰ দাবী কৰে গগৈয়ে।

“সনাতন ডেকাৰ হত্যাকাৰীয়ে কঠোৰতম আইনী শাস্তি পাব লাগে আৰু চৰকাৰৰ গৃহবিভাগে উচিত ব্যৱস্থা গ্ৰহণ কৰা প্ৰয়োজন, যাতে দুনাই এনে ঘটনা সংঘটিত হ’ব নোৱাৰে।”

আনহাতে, এচামে এই ঘটনাক সাম্প্ৰদায়িক ৰূপ দিবলৈ চেষ্টা কৰাটোও অত্যন্ত গৰিহণা যোগ্য বুলি উল্লেখ কৰি লুৰিণে কয়, “হাজো সাম্প্ৰদায়িক ঐক্যৰ সমন্বয়স্থলী। এখন নিৰ্বাচিত চৰকাৰ,গৃহ বিভাগ থকাৰ পিছতো কিদৰে এনে ঘটনা সংঘটিত হৈছে আৰু তাক ৰোধ কৰাৰ বাবে চৰকাৰ ব্যৰ্থ হোৱাটোৱে সমাজত সাম্প্ৰদায়িক আৰু নেতিবাচক বাৰ্তাবহন কৰে।”

উল্লেখযোগ্য যে অভিযুক্ত ফইজুল আলি,নজদিন আলি, ছবিৰ আলি, ইউচুফ আলি আৰু ফিৰজাহান আলি বৰ্তমানো পলাতক অৱস্থাত আছে। হাজোৰ মনাহকুচিত সংঘটিত হৈছিল এই নৃশংস হত্যাকাণ্ড।

ইপিনে, টুইটাৰযোগে এই ঘটনাৰ তীব্ৰ ভাষাৰে গৰিহণা দিয়াৰ লগতে দোষীৰ উচিত শাস্তি দাবী কৰে আছুৰ মুখ্য উপদেষ্টা ডঃ সমুজ্জ্বল কুমাৰ ভট্টাচাৰ্য্যই।

তেওঁ কয় যে যিহেতু চৰকাৰৰ হাতত খৱৰ আছে, গতিকে হত্যাকৰাৰীক শীঘ্ৰে কৰায়ত্ত কৰাৰ লগতে দৃষ্টান্তমূলক শাস্তি প্ৰদান কৰিব লাগে।